Қазақ халқы үшін қасиетті жануардың бірі – жылқы. Ежелден қолға үйреткен, мінезін таныған, тұрмыс-тіршілігін жылқысыз елестете алмайтын халықтың бүгінгі ұрпағы да бұл дәстүрді жалғап келеді. Сарқан ауданындағы «Арлан» шаруа қожалығы асыл тұқымды жылқы өсіруді жолға қойған үлгілі шаруашылықтың бірі.
Саялы Сарқан баурайында орналасқан қожалықты Қайрат Бершімбеков басқарады. Өмірін мал шаруашылығына арнаған азамат жасы ұлғайған сайын ірі қарадан гөрі жылқы ұстауды жөн санапты.
– Қазақ малсыз өмір сүре алмайды, әсіресе жылқысыз. Жылқы – ер қанаты. Оның ерекше қасиеті – туған жерін ұмытпайды, күндіз-түні бірдей көреді, айналасын жіті бақылайды. Ағын суды да лай жерінен емес, тұнық тұсынан ішеді. Осы мінезі үшін төрт түліктің ішінде жылқыны ерекше қадірлеймін. Қазір шаруашылықта 500-ге жуық бас бар. Соның ішінде 30-ы бәйгеге, көкпарға мінетін бөлек жүйріктер, – дейді Қайрат Сенбіұлы.
Қожалықта селекциялық жұмыс жолға қойылған. Асыл тұқымды жылқы өсірумен қатар, Алматыдағы мамандармен бірлесе отырып, жаңа тұқым шығаруды да жоспарлап отыр.
Малға бас-көз болып жүрген Балтабек Оразбековтың айтуынша, қорадағы 100-ден астам жылқы бір күнде шамамен 500 келі шөп жейді. Арпа, бидай және жоңышқа қосылған жемді жақсы жегендіктен, қоңы көтерілген малдың түрін көрген жан тамсанбай қоймайды.
Қазақтың сән-салтанатының көркі де жылқы. Халқымыз айтқандай: «Мінсең – көлік, жесең – ет, ішсең – қымыз». Осындай текті малды өсіріп, тұқымын көбейтіп отырған шаруақор азаматтардың қатары артса, ұлттық құндылығымыздың да мерейі үстем болмақ.
Жақсылық ИГІМАН,
Сарқан ауданы
