Отбасының цифрлық картасын енгізудің нәтижесінде 2025 жылдың басынан бері әлеуметтік-еңбек саласындағы мемлекеттік қызметтерді проактивті көрсету үшін 463,3 мың адамға SMS-хабарлама жолданды. Оның ішінде 246,3 мыңнан астам адам өтініш берусіз жәрдемақы немесе төлем алу мүмкіндігін пайдаланып үлгерді, деп хабарлайды ҚР Еңбек және халықты әлеуметтік қорғау министрлігі.
Отбасының цифрлық картасы мемлекеттік органдардың қолданыстағы ақпараттық жүйелерінің деректері негізінде қалыптастырылады. Қазіргі таңда онда Қазақстанның 20 миллион азаматы немесе 6,2 млн.-нан астам отбасы туралы ақпарат жинақталған.
ОЦК енгізудің басты мақсаты – қазақстандықтардың мемлекеттік қолдау жүйесіне тең қолжетімділігін қамтамасыз ету. Осыған байланысты ҚР Әлеуметтік кодексінде Отбасының цифрлық картасы әлеуметтік саясаттың орта және ұзақ мерзімді міндеттері мен бағыттарын айқындау құралы ретінде бекітілген. Сонымен қатар, ОЦК азаматтардың әлеуметтік мәртебесіне байланысты қандай мемлекеттік қолдау түрін алуға құқылы екендігін күнделікті еске салатын «электрондық хабарлама» қызметін атқарады.
Бүгінде ОЦК арқылы азаматтар өтініш жазбай-ақ жәрдемақылар мен әлеуметтік төлемдердің 11 түрін ресімдей алады. Оларға еңбек ету қабілетінен айырылған жағдайда төленетін әлеуметтік төлем, жұмысынан айырылу бойынша төлем, асыраушысынан айырылу бойынша төлем, бала туу мен күтіміне арналған жәрдемақылар, мүгедектігі бар баланы тәрбиелеп отырған ата-аналарға жәрдемақы, мүгедектік жәрдемақылары, көпбалалы отбасылар мен «Алтын алқа», «Күміс алқа» иелеріне төленетін жәрдемақылар, атаулы әлеуметтік көмек және жерлеуге арналған біржолғы төлем кіреді.
Сонымен бірге, ОЦК арқылы зейнетақы төлемдерін алу мүмкіндігі, қандас мәртебесінің аяқталуы туралы автоматты ескерту, жұмыссыз азаматтарға жұмыспен қамту шаралары бойынша хабарламалар іске қосылған.
Мемлекеттік қолдау шарасына құқығы анықталған кезде азаматқа 1414 байланыс орталығынан SMS-хабарлама жіберіледі. Хабарламаға келісім туралы жауап берген жағдайда өтініш автоматты түрде ресімделеді, жәрдемақы немесе төлем тағайындалып, қаражат алушының банк шотына аударылады.
Министрлік азаматтарды алаяқтықтың алдын алу мақсатында SMS тек 1414 нөмірінен келетінін және міндетті түрде осы хабарламаға жауап беру қажеттігін ескертеді.
