Қазақстан Республикасы Мәдениет және ақпарат министрлігі Архив, құжаттама және кітап ісі комитетінің төрағасы Рустам Әли кітапхана және баспа саласының өкілдерімен кездесу өткізді, – деп хабарлайды 7-su.kz ақпарттық порталы.
Алматы қаласындағы кездесуде кітапхана қызметін жетілдіру, баспа ісін дамыту, авторлық құқықты қорғау тетіктерін күшейту, сала мамандарын даярлау сияқты маңызды мәселелер талқыланды. Сонымен қатар кітапханалардың материалдық-техникалық базасын нығайту, кітап қорларының сапасын жақсарту қажеттігі де көтерілді.
Жиын барысында қатысушылар «Кітапхана және кітап ісі туралы» заңды қабылдаудың маңызын ерекше атап өтті. Олардың пікірінше, жаңа заң саланы жүйелі дамытуға, кітапханаларды жаңғыртуға және баспа ісінің әлеуетін арттыруға серпін береді.
Сала өкілдері заң жобасына енгізілуі тиіс ұсыныстарын ортаға салып, кітапхана қызметінің заманауи талаптарға сай болуын қамтамасыз ететін басым бағыттарды айқындады.
