«Қорғас – Шығыс қақпасы» арнайы экономикалық аймағында Сингапур брендімен танымал «MacCoffee» 3х1 шай және кофе шығаратын «Empire Manufacturing Kazakhstan» ЖШС компаниясы құны 8 млрд. теңге болатын жаңа зауыттың құрылысын жүргізуде.
Зауыт келер жылы көктемде толық пайдалануға беріледі деп жоспарлануда. Дайын өнім Қазақстанның ішкі нарығына жеткізіліп, содан кейін шетелге экспортталмақ. Қазір зауытқа құрылғылар орнатылуда. Әзірге мұнда 35 адам жұмыс істейді. Оның басым бөлігі жергілікті тұрғындар. «Empire Manufacturing Kazakhstan» ЖШС компаниясының өндіріс бойынша директоры Виджиш Манур:
– Зауытта кофенің 30, шайдың 10 түрі өндіріледі. Өндіріс орны толық іске қосылғанда қуаттылығы айына 1 200 тонна өнім шығарады. Кофе Вьетнам, Үндістан және Бразилия елдерінен жеткізіледі. Ал шайды Қытай мен Сингапурдан әкелеміз. Сондай-ақ, 250 адамды жұмыспен қамтимыз деген жоспарымыз бар, – дейді.
Алдағы уақытта арнайы мамандар келіп, жергілікті тұрғындарға кофе мен шайдың қалай жасалатынын, құрылғылармен қалай жұмыс істеу керектігін үйретеді.
Жаңа зауыт іске қосылса өңір экономикасына қосымша серпін беріп, жаңа жұмыс орындарының ашылуына ықпал етпек.
Айдар ҚАЛИЕВ
