2 желтоқсанда Брюссель қаласында Қазақстан Республикасы мен Еуропалық одақ арасындағы Визалық режимді жеңілдету жөніндегі келісім және Реадмиссия туралы келісім бойынша алғашқы ресми келіссөздер раунды өтті, – деп хабарлайды 7-su.kz ақпараттық порталы.
Бұл туралы ҚР Сыртқы істер министрлігі 3 желтоқсанда ресми мәлімдеді.
Келіссөздерге Қазақстан тарапынан Сыртқы істер министрінің орынбасары Әлібек Бақаев, ал Еуропалық комиссияның Миграция және ішкі істер жөніндегі бас директоратының бас директорының орынбасары Йоханнес Лухнер тең төрағалық етті.
Ынтымақтастықтың 10 жылдығындағы маңызды қадам
Министрлік мәлімдемесінде келіссөздердің басталуы Қазақстан мен ЕО арасындағы қатынастардың жоғары деңгейін көрсететіні, сондай-ақ желтоқсан айында қол қойылғанына 10 жыл толатын Кеңейтілген серіктестік пен ынтымақтастық туралы келісімнің логикалық жалғасы екені атап өтілді.
“Жаңа келіссөздер трегінің іске қосылуы – он жыл бойы жүйелі дамып келе жатқан қатынастардың жетілгенін, мазмұндылығын және стратегиялық бағыттылығын көрсетеді”, – делінген хабарламада.
Тараптар бұл келіссөздер азаматтар үшін жаңа мүмкіндіктер ашатынын, гуманитарлық байланыстарды және халықтар арасындағы қарым-қатынасты нығайтатынын айтты. Сонымен қатар, визаны жеңілдету мен реадмиссияға қатысты келісімдер – ЕО мен Орталық Азия мемлекеті арасындағы тұңғыш процесс екені ерекше атап өтілді.
Конструктивті диалог және алдағы жоспарлар
Келіссөздер конструктивті әрі іскерлік атмосферада өтті. Тараптар өз ұстанымдарын талқылап, бастапқы бағыттарды келісіп, алдағы жұмыстың негізгі басымдықтарын анықтады. Бұл процесс екі жақтың да сапарларды жеңілдетуге, ынтымақтастықты кеңейтуге және қазіргі заман талаптарына сай құқықтық негіз қалыптастыруға дайын екенін көрсетті.
Ресми келіссөздердің басталғаны 1 желтоқсанда Брюссельде өткен Қазақстан – Еуроодақ ынтымақтастық кеңесінің 22-ші отырысында жарияланған болатын. Оған ҚР Сыртқы істер министрі Ермек Көшербаев және ЕО-ның сыртқы саясат жөніндегі жоғары өкілі Кая Каллас төрағалық етті.
Келесі раунд – 2026 жылы Астанада
Қазақстан мен Еуропалық одақ келіссөздерді жалғастыруға және келесі раундты 2026 жылы Астанада өткізуге уағдаласты.
Айта кетейік, бұған дейін 4 желтоқсанда Астанаға Еуропалық кеңестің президенті Антониу Кошта келетіні хабарланған.
