Білімді ұрпақ тәрбиелеу – ел дамуының берік іргетасы. Балалардың ой-өрісін кеңейтіп, ғылыми қабілетін шыңдауда түрлі пәндік сайыстардың рөлі зор. Осы ретте Талдықорғанда химия пәніне қызығушылығы жоғары жас таланттарды анықтауға бағытталған олимпиада өтті.
ChemTalent байқауына 7-9-сынып аралығындағы 50-ге жуық жас дарын жиналды. Олар жұптық форматта бірнеше тәжірибелік тапсырманы орындап, өз білім деңгейін көрсетуге мүмкіндік алды. Солардың бірі – 13 жасар Назерке Тұрархан. Ол химия әлеміне ерекше қызығатын жас зерттеуші. Бұған дейін облыстық және республикалық деңгейдегі ғылыми сайыстарда топ жарып жүрген жас бұл жолы да өз білімі мен шеберлігін шыңдауды мақсат етіп келіпті.
№20 мамандандырылған лицейдің оқушысы Назерке алғашқы тәжірибе туралы әсерімен бөлісті.
– Бірінші эксперимент «Сұйықтық мұнарасы» деп аталады. Берілген сұйықтықтардың тығыздығын есептеп, мұнара жасауымыз керек. Бұрын мұндай тәжірибелермен айналысқан соң аса қиындық туғызған жоқ. Барлық сынақтан сүрінбей өтуге тырысамыз, – дейді жас химик.
Олимпиада аясында оқушыларға барлығы төрт тәжірибелік тапсырма ұсынылды. Ұйымдастырушылардың айтуынша, мұндай сынақтар оқушылардың пәнге деген қызығушылығын арттырып қана қоймай, зертханалық дағдыларын дамытуға септігін тигізеді. Бұл байқау 2023 жылдан бері дәстүрлі түрде өткізіліп келеді. Алдымен жаратылыстану бағытындағы пәндер бойынша онлайн тест жүргізіліп, химия пәнінен қатысушысы ең көп қала таңдалады. Осыған сәйкес биылғы дода Талдықорғанда ұйымдастырылған.
«El Umiti» корпоративтік қорының олимпиадалық даярлау орталығының басшысы Абылайхан Қайроллаев «Оқушылар жұмыстары арнайы талаптар бойынша бағаланып, үздіктер сертификаттар мен дипломдарға ие болады», – деді.
Химияға құштар жастарды қолдауды мақсат еткен бұл білім додасына «El Umiti» корпоративтік қоры ұйытқы болып отыр. Алдағы жылы да олимпиаданы тұрақты түрде өткізу жоспарланған. Қатысу тегін. Жалпы, биылғы сайысқа келген оқушылардың дайындық деңгейі жоғары екені байқалды.
Медет ЖҰМАБАЙ
