Мемлекет басшысы Қасым-Жомарт Тоқаев «Алтын сапа» және «Парыз» сыйлығының лауреаттарын, сондай-ақ «Қазақстанның үздік тауары» республикалық көрме-байқауының жеңімпаздарын марапаттау рәсімінде Үкіметке бірқатар маңызды міндет жүктеді, – деп хабарлайды 7-su.kz ақпараттық порталы.
Президенттің айтуынша, соңғы жылдары Қазақстан бәсекелестік артықшылықтарын толық ашуға, жаңа экономикалық мүмкіндіктерді игеруге, инвестиция тартуға және кәсіпкерлікті қолдауға бағытталған.
«Үкіметтің алдында сапалы экономикалық өсімді қамтамасыз ету міндеті тұр. Жолдауымда инфляцияның шарықтауына жол беруге болмайтынын айттым. Өйткені инфляция азаматтардың әл-ауқатын арттыруға бағытталған барлық шешім мен әрекетті жоққа шығарады. Сондықтан өте қатаң бюджет тәртібі қажет. Қаржы тек ішкі жалпы өнімнің өсуіне және еліміздің әлемдік аренадағы орнын нығайтуға ықпал ететін басым жобаларға жұмсалуға тиіс», – деді Қасым-Жомарт Тоқаев.
Президент ауыл шаруашылығы саласындағы мәселелерге де тоқталды. Оның айтуынша, отандық өніммен қамтамасыз ету ісі әлі де толық шешімін таппаған.
«Импорт өте көп. Бұл көзге анық көрініп тұр. Бірқатар тауар номенклатурасы бойынша біз сырттан келетін өнімге тым тәуелдіміз. Қазақстанда бұған жол беруге болмайды. Оның үстіне биыл мемлекет тарапынан ауыл шаруашылығына 1 триллион теңге көлемінде қолдау жасалды. Бұл – рекордтық көрсеткіш. Ал елімізде өндірілген ауыл шаруашылығы өнімдерінің жалпы көлемі 2024 жылдың қорытындысы бойынша 8,5 триллион теңгеге жуықтады», – деді Мемлекет басшысы.
Президент жиын барысында Үкіметке экономикалық тұрақтылықты қамтамасыз ету, ішкі нарықты отандық тауармен толықтыру және тиімді қаржылық саясат жүргізу бойынша нақты тапсырмалар берді.
