Қазақстандықтар 2026 жылы үнемдеуге мәжбүр болуы мүмкін. Белгілі экономист Айдархан Құсайынов ел экономикасын 2025-2026 жылдары күрделі кезең күтіп тұрғанын мәлімдеді. Оның айтуынша, 2025 жылдың өзінде халық табысының төмендеуі байқалып, жұрттың қалтасы жұқара бастады. Бұл туралы 7-su.kz ақпараттық порталы хабарлайды.
Экономист бұл туралы «Oshakbayev Live» бағдарламасында айтып, ең қиын кезеңнің 2026 жылы болатынын ескертті. Сарапшының пікірінше, сол уақытта жалақыны индекстеу тоқтап, халық кірісі бір орында тұрып қалуы мүмкін.
«Үкіметтің “болашақ инвестициялар” туралы айтқан әдемі сөздеріне сенудің қажеті жоқ. Бұл уәделер нақты жобалармен дәлелденбеген», – дейді Құсайынов.
Бюджет тапшылығы және әлеуметтік шиеленіс қаупі
Экономистің айтуынша, 2026 жылдың алғашқы жартысында бюджетке түсетін салық көлемі күрт азайып, ел қазынасы тапшылыққа ұшырауы ықтимал. Бұл салық органдары мен кәсіпкерлер арасындағы қақтығыстардың көбейуіне әкеп соғуы мүмкін.
Сарапшының сөзіне қарағанда, табысы артпай жатқан халыққа салық жүктемесінің күшеюі әлеуметтік наразылықты күшейту қаупін туғызады.
Теңгенің болашағы және несие қыспағы
Айдархан Құсайынов Қазақстан экономикасының бірнеше негізгі фактор бойынша тығырыққа тірелгенін атап өтті:
- тұтынушылық несиелерді беру шектеліп жатыр;
- импортқа тәуелділік күшейген;
- экономикалық өсім іс жүзінде тоқтаған.
Ол ұлттық валютаның болашағына да алаңдаулы. Сарапшы теңгенің әрі қарай құнсыздануы мүмкін екенін жоққа шығармайды. Импортқа тәуелділік пен экономиканы қолдауға бағытталған тиімсіз шаралар жағдайды одан сайын қиындатады.
Құсайыновтың болжамынша, ең ауыр кезең 2026-2027 жылдары, ел сайлауалды кезеңге жақындағанда сезіледі.
Қарапайым халық не істей алады?
Экономист қазіргі жағдайды ескеріп, азаматтарға қаржылық тәртіпке қазірден бастап көшуге кеңес береді:
- Шығындарды қысқарту: қажетсіз заттарға ақша жұмсамау;
- Қор жинау: табыстың бір бөлігін «қауіпсіздік жастығына» жинақтау;
- Алдын ала жоспар құру: табыс төмендеген жағдайда қалай әрекет ететініңізді ойластыру.
