Мемлекет басшысы Халықаралық бейбітшілік және сенім жылына, Халықаралық бейтараптық күні мен Түрікменстанның тұрақты бейтараптығының 30 жылдығына арналған форумға қатысты, – деп хабарлайды 7-su.kz ақпараттық порталы.
Қасым-Жомарт Тоқаев түрікмен халқының Ұлт көшбасшысы Гурбангулы Бердімұхамедов пен Президент Сердар Бердімұхамедовті Түрікменстанның тұрақты бейтараптығының 30 жылдығымен құттықтады.
Президент Түрікменстанның бейтарап саяси ұстанымы Еуразия құрлығының тұрақтылығы мен орнықты дамуына зор үлес қосып келе жатқанын атап өтті. Форумда көтерілген бастамалар ХХІ ғасырдағы бейтараптықтың мәні мен маңызын жаңа қырынан ашатыны айтылды.
Қасым-Жомарт Тоқаев Түрікменстанның бейтараптық саясаты түрікмен халқының сан ғасырлық мәдени дәстүрлерімен және рухани құндылықтарымен үйлесетінін жеткізді.
– Түрікмен классикалық әдебиетінің негізін қалаушы, Шығыстың көрнекті ойшылы Мақтымқұлы Пырағы: «Тыныштық болса ел өседі, әділдік болса сенім күшейеді» деген. Ұлы данышпанның дүниені терең таныған идеялары қазіргі күрделі халықаралық жағдайда да өзекті болып отыр, – деді Мемлекет басшысы.
