Ашхабадтағы халықаралық форум аясында Қазақстан Президенті Қасым-Жомарт Тоқаев Грузия премьер-министрі Ираклий Кобахидземен кездесті, – деп хабарлайды 7-su.kz ақпараттық порталы.
Кездесу барысында Мемлекет басшысы Грузияны Қазақстанның Оңтүстік Кавказдағы сенімді серіктесі ретінде бағалады. Сондай-ақ екі халық арасындағы берік достыққа, тарихи тамырластыққа негізделген ұзақ жылғы ынтымақтастықты жоғары бағалады.
Қасым-Жомарт Тоқаев пен Ираклий Кобахидзе саяси диалог, экономикалық және гуманитарлық байланыстардың дәйекті түрде дамып келе жатқанын растап, екіжақты ынтымақтастықтың кең көлемді мәселелерін талқылады.
Мемлекет басшысы Грузиямен көлік-логистика және сауда-экономика салаларындағы ынтымақтастықты одан әрі арттыру әлеуетінің зор екенін атап өтті.
