Мемлекет басшысы Жапония металл және энергетикалық қауіпсіздік жөніндегі ұйымының (JOGMEC) төрағасы Ичиро Такахаруды қабылдады.
Кездесу барысында геологиялық барлау, аса маңызды минералдарды өндіру және өңдеу, сондай-ақ табиғи ресурстарды орнықты басқару салаларындағы екіжақты ынтымақтастықтың перспективалары талқыланды.
Қасым-Жомарт Тоқаев JOGMEC ұйымының Қазақстанда бірлескен жобаларды жүзеге асыруға қызығушылық танытуын жоғары бағалады. Әңгімелесу барысында ұйымның еліміздегі геологиялық барлау жобаларына қатысуы және Қазақстанда өкілдік ашу мүмкіндіктері де қарастырылды.
Мемлекет басшысының пікірінше, мұндай қадамдар бірлескен жобаларды тиімді үйлестіруге, сондай-ақ Жапонияның өндірістік және технологиялық компанияларының Қазақстан нарығына кеңінен келуіне жол ашады.
Айта кетейік, JOGMEC – Жапонияның энергетикалық және минералды шикізат қауіпсіздігіне жауапты негізгі мемлекеттік институт. Ұйым мұнай, газ, сутегі, аммиак және сирек кездесетін металдардың тұрақты жеткізілімін қамтамасыз ететін мемлекеттік оператор ретінде қызмет атқарады.
«Жетісу-Ақпарат»
