Мемлекет басшысы Қасым-Жомарт Тоқаев Қазақстанның халықаралық аренада беделді әрі сенімді серіктес ретінде кеңінен мойындалғанын атап өтті.
Президенттің айтуынша, Қазақстан жақын көршілері – Ресеймен, Қытаймен және Орталық Азия елдерімен жан-жақты стратегиялық серіктестікті жүйелі түрде дамытып келеді. Бұл тату көршілік қарым-қатынастар еліміздің Еуразия кеңістігінде сенім мен өзара байланысты нығайтуға мүмкіндік беретін маңызды стратегиялық артықшылығы болып саналады.
Сонымен қатар Қасым-Жомарт Тоқаев Америка Құрама Штаттарымен және Еуропа Одағымен ұзақ мерзімді ықпалдастықты кеңейту, сондай-ақ Таяу Шығыс, Азия және Жаһандық Оңтүстік елдерімен ынтымақтастықты күшейту Қазақстанның сыртқы саясатындағы басым бағыттардың бірі екенін айтты.
Президент Жапонияның Қазақстан үшін маңызы зор екенін атап өтіп, сауда-инвестициялық ынтымақтастықтың жаңа мүмкіндіктеріне жол ашу үшін екіжақты қарым-қатынасты одан әрі тереңдетуге ниетті екенін жеткізді.
Мемлекет басшысының пікірінше, геосаяси тұрғыдан жікке бөлінген қазіргі әлемде Қазақстанның теңгерімді әрі прагматикалық ұстанымы конструктивті дипломатияны нығайта түседі.
