Үкіметтің 2025 жылға арналған қызметін қорытындылау аясында су ресурстары және ирригация министрі Нұржан Нұржігітов саланы дамыту мәселелері бойынша бұқаралық ақпарат құралдарының өкілдерімен кездесу өткізді. Кездесу Astana Hub алаңында өтті.
Бұл туралы 7-su.kz ақпараттық порталы хабарлайды.
Баспасөз жиынында министр Қазақстанда су шаруашылығы инфрақұрылымын жаңғырту және дамыту бағытында жүйелі жұмыс жүргізіліп жатқанын атап өтті. Оның айтуынша, 2025 жылы ел бойынша су саласына қатысты 145 жоба іске асырылуда, сондай-ақ 300-ге жуық нысан бойынша жобалау-сметалық құжаттама мен техникалық-экономикалық негіздеме әзірленіп жатыр.
Министрдің мәліметінше, Алматы облысындағы Қызылағаш су қоймасы мен Абай облысындағы Шар су қоймасын реконструкциялау жұмыстары аяқталған. Сонымен қатар Астана қаласының негізгі ауыз су көзі саналатын Астана су қоймасын ауқымды тазарту жұмыстарының бірінші кезеңі толықтай жүзеге асырылды.
Нұржан Нұржігітов 2025 жылы жүзеге асырылып жатқан ірі жобаларға да тоқталды. Оның айтуынша, Қапшағай су қоймасын реконструкциялау биыл аяқталады. Сондай-ақ Батыс Қазақстан облысында 58 жылда алғаш рет Киров су қоймасына күрделі реконструкция жүргізілуде.
«2024 жылы Ақтөбе су қоймасының реконструкциясы толық аяқталды. Сонымен қатар бес жыл бойы тоқтап тұрған Қызылорда су торабын жаңғырту жұмыстары қайта жанданды», – деді министр.
Үкімет қызметінің жылдық қорытындыларына арналған баспасөз мәслихатында ауыз сумен қамтамасыз ету мәселесіне де ерекше назар аударылды. Су ресурстары және ирригация министрлігінің мәліметінше, 469 мыңнан астам адам тұратын 224 елді мекенді сумен қамтамасыз ететін 13 топтық су құбырын пайдалануға беру жоспарланып отыр.
Министрдің айтуынша, 43 елді мекендегі 32 мың тұрғын алғаш рет орталықтандырылған ауыз су жүйесіне қосылды. Атап айтқанда, Солтүстік Қазақстан облысында Есіл топтық су құбырын реконструкциялау жобасы аясында 52 ауылдың ауызсу мәселесі шешімін тапты. Бұл елді мекендерде 35 мыңнан астам адам тұрады.
Жоба аясында 100 шақырымнан астам су құбыры желісінде құрылыс және жаңғырту жұмыстары жүргізілді. Сонымен қатар Ұлытау облысында жүзеге асырылып жатқан Есқұла су құбырын салу жобасы нәтижесінде 75 мыңнан астам тұрғыны бар елді мекендердің ауызсумен қамтылу деңгейі айтарлықтай жақсаруда.
Министр өткен жылы атқарылған жұмыстарға да тоқталды. 2024 жылы алты облыста сегіз топтық су құбырын салу және реконструкциялау жұмыстары аяқталған. Нәтижесінде 208 мың адам тұратын 49 елді мекеннің сумен жабдықтау жүйесі едәуір жақсарды.
Су ресурстары және ирригация министрлігінің мәліметінше, бұл жобалар Президенттің халықты сапалы ауыз сумен қамтамасыз ету жөніндегі тапсырмаларын орындауға, сондай-ақ елдегі су қауіпсіздігін нығайтуға бағытталған.
