Талықорғандағы «Жастар-3» жаңа тұрғын үй алабында баспана кезегінде тұрған әлеуметтік жағынан осал топтағы жандарға 18 үй берілді. Қоныс иелерін қала әкімі Ернат Бәзіл арнайы келіп құттықтап, баспана кілтін сән-салтанатпен табыстады. Бұл Президенттің тапсырмасына сай, облыс басшылығының қолдауымен жаңа тұрғын үй алабын салу, дамыту бойынша жүзеге асты.
Жаңа тұрғын үй алаптарын толық инфрақұрылыммен қамту біздің басым бағыттарымыздың бірі. Бүгінде «Жастар-3» тұрғын үй алабында ауызсу, кәріз жүйесі және түнгі жарықтандыру инфрақұрылымдары жүргізілген. Сонымен қатар тұрғын үй алабы табиғи газбен толық қамтылған. Ал жолды жақсарту мақсатында жалпы ұзындығы 3,5 шақырымды құрайтын асфальт төселеді, – деді өз сөзінде Ернат Дүйсенбекұлы.
Баспаналы болып, көп жылғы ауыртпашылықтан жеңілдегендердің бірі Ангелина Степных:
– Күйеуім құрылыста істейді. Өзім 6 баланың анасымын. Осыған дейін 100 мыңға қалада пәтер жалдап тұрғанбыз, бұл сәтті ұзақ күттік, – дейді.
Сол сияқты Аяулым Тойшыбекова:
– Екі ұлым бар. Үлкені 3-те, кішісі 2-де. Күйеуім Жастар ауылындағы колледжде жұмыс істейді. Ал үй кезегінде 2012 жылдан бері тұрамын. Өзім дәл қазір үй шаруасындамын,– деді.
Қалалық әкімдіктің ақпаратынша «Жастар-3» тұрғын үй алабында құрылыс жұмыстары 2024 жылдан бері жүргізіліп келеді. Бүгінде 310 үйдің құрылысы толық аяқталған (оның ішінде 56 баспана үй кезегінде тұрғандарға берілген).
Серік ҚАНТАЙ
