Президент Қасым-Жомарт Тоқаев Қазақстанның Жапониямен бірлескен Next-Generation SmartMining Plus жобасының іске қосылуын құптайтынын мәлімдеді. Бұл бастама өңірдегі сирек кездесетін элементтер мен маңызды минералдардың тиімді әрі экологиялық таза өндірілуін қамтамасыз етеді.
– Орталық Азияда сирек кездесетін элементтер мен өзге де аса маңызды минералдардың мол қоры бар. Бұл ресурстар әлемнің жаңа энергетикалық жүйеге көшуіне қажетті маңызды элементтер саналады. Өңіріміз таза әрі қуат үнемдейтін өндірістерді қамтамасыз ете алады, – деді Мемлекет басшысы.
Президенттің айтуынша, Қазақстан Жапониямен қазба байлықтарды барлау, өндіру және өңдеу ісінде ынтымақтастықты тереңдетуге мүдделі. Сонымен бірге терең өңдеуге, орнықты өндіріс тізбегін қалыптастыруға және толыққанды өнеркәсіп кластерін құруға басымдық беріледі.
– Қазақстан Жапониямен бірлескен Next-Generation SmartMining Plus жобасының іске қосылуын қолдайды. Бұл бастама өндіріс үдерісін цифрландырып, экологиялық орнықтылықты арттырады, – деді Қасым-Жомарт Тоқаев.
Жоба Қазақстанның минералдық ресурстарын тиімді пайдаланып, заманауи технология мен цифрландыру арқылы өнеркәсіптің орнықты дамуына үлес қосуға бағытталған.
