АҚШ Президенті Дональд Трамп Қазақстан Президентінің тұлғасына жоғары баға беріп, жылы лебізін білдірді. Бұл туралы Мемлекет басшысының көмекшісі – Баспасөз хатшысы Руслан Желдібай мәлімдеді, – деп хабарлайды 7-su.kz ақпараттық порталы.
2025 жылдың 16 желтоқсанында Қазақстанның АҚШ-тағы Төтенше және өкілетті елшісі Мағжан Ілиясов Президент Дональд Трампқа сенім грамотасын тапсырды. Ресми рәсімнен кейін тараптар екіжақты қарым-қатынастарды нығайту бағытында қысқаша әңгімелескен.
Кездесу барысында АҚШ Президенті биылғы қараша айында Ақ үйде Қасым-Жомарт Тоқаевпен өткен келіссөздерден алған әсерімен бөлісті. Дональд Трамп Қазақстан Президентін:
«Халықаралық үдерістерді терең білетін, жан-жақты түсінетін тәжірибелі мемлекет қайраткері және тамаша тұлға», – деп сипаттады.
АҚШ Президенті достық пен құрметтің белгісі ретінде Қасым-Жомарт Тоқаевқа ерекше сыйлықтар жолдады. Олардың қатарында:
-
Ақ үйдің символикалық кілті;
-
Дональд Трамптың жеке қолтаңбасы қойылған бейсболка бар.
Руслан Желдібайдың айтуынша, бұл ишара екі ел арасындағы стратегиялық серіктестіктің жаңа деңгейге көтерілгенін және жоғары деңгейдегі сенімді диалогтың қалыптасқанын көрсетеді.
Айта кетейік, Қазақстан мен АҚШ арасындағы қарым-қатынастар инвестиция, энергетика және аймақтық қауіпсіздік салаларында белсенді дамып келеді.
