Қазақстан Президенті Қасым-Жомарт Тоқаев Ресей Федерациясының Президенті Владимир Путинмен кездесу өткізді.
Кездесу барысында Мемлекет басшысы жаңа жыл қарсаңында Санкт-Петербургте өткен дәстүрлі жүздесудің мазмұнды болғанын атап өтті. Оның айтуынша, кездесуде Еуразиялық экономикалық одақтың (ЕАЭО) қызметіне қатысты бірқатар мәселелер қаралып, тиісті шешімдер қабылданған.
ТМД форматы аясындағы ықпалдастықтың аса маңызды әрі өзекті мәселелері талқыланды. ТМД – беделді және заман талабына сай халықаралық ұйым. Биылғы өзара ынтымақтастығымыздың нәтижелі болғаны анық. Қазақстан мен Ресей арасындағы екіжақты қарым-қатынас қарқынды дамып келеді. 12 қарашада Ресейге жасаған мемлекеттік сапарым өте табысты өтті. Сол сапар барысында көрсеткен қонақжайлығыңыз үшін алғыс айтамын. Қазақстан Ресеймен стратегиялық серіктестік пен одақтастыққа ерекше мән береді. Ынтымақтастығымызды нығайтуға бағытталған ортақ жұмысымыз қос халықтың мүддесіне сай келеді, – деді Қасым-Жомарт Тоқаев.
Өз кезегінде Ресей Президенті Владимир Путин кездесудің бейресми форматта өтіп, мазмұнды болғанын айтты.
Кешеден бері ауқымды жұмыс атқарылды. Бүгінгі кездесуде ҰҚШҰ, ТМД аясындағы қызметіміз бен екіжақты ынтымақтастық мәселелерін талқыладық. Қазақстан мен Ресей арасындағы өзара байланыстардың басым бағыттарын дамыту үшін арнайы жүздескеніме қуаныштымын. Барлық салада оң серпін байқалады. Екі ел арасында шешілмеген немесе түйткілді мәселе жоқ, – деді Владимир Путин.
