Алакөл ауданының жас спортшысы облыстық ашық чемпионатта алтын тұғырдан көрініп, үздік нәтиже көрсетті, – деп хабарлайды 7-su.kz ақпараттық порталы ҚР ҰҚК Шекара қызметінің Жетісу облысы бойынша департаментіне сілтеме жасап.
ҚР ҰҚК Шекара қызметі Жетісу облысы бойынша департаментіне қарасты Алакөл ауданы бойынша шекара басқармасының «Жас шекарашы» үйірмесінің тәрбиеленушісі Калиахмет Бегарыс Берікұлы өз қатарластары арасында оқ бойы озық шықты. 2013–2016 жылдары туған жасөспірімдер қатысқан тартысты бәсекеде Бегарыс І орынды иеленіп, жарыс жеңімпазы атанды.
Республикалық додаға жолдама Бұл жеңіс жас спортшыға тек алтын медаль ғана емес, сонымен қатар алдағы уақытта өтетін Қазақстан Республикасының чемпионатына қатысуға мүмкіндік беретін ресми жолдама сыйлады. Мамандардың пікірінше, Бегарыстың бұл жетістігі – оның бойындағы табандылық пен қажырлы дайындықтың жемісі.
«Жас шекарашы» үйірмесінің рөлі Шекара басқармасы жанынан құрылған үйірме тек әскери-патриоттық тәрбие беріп қана қоймай, жасөспірімдердің физикалық тұрғыдан шымыр болып өсуіне де жағдай жасауда. Мұндай тәрбие жұмыстары болашақ шекарашылардың салауатты өмір салтын ұстануына және ел намысын қорғайтын спорт шеберлерінің шығуына негіз болады.
Жетісулық жас чемпионның республикалық аренада да жеңіс тұғырынан көрінуіне тілектеспіз.
