Алматыда қазақ өнерінің аңызы Асанәлі Әшімовпен қоштасу рәсімі өтті. Қаралы жиында кезінде «Қыз Жібек» фильмінде бірге өнер көрсеткен танымал актриса Меруерт Өтекешова тебірене сөз сөйледі.
Актриса өз сөзінде қазақ киносы мен театрының жарық жұлдызы, Бекежан рөлін сомдаған Асанәлі Әшімовтің қазасы бүкіл халық үшін орны толмас қайғы екенін атап өтті. Меруерт Өтекешова өзінің өнер жолындағы алғашқы қадамдарында марқұмның үлкен қолдау көрсеткенін еске алды.
Ол «Қыз Жібек» фильміндегі серіктестерін еске алып, жиналғандардың көзіне жас алдырды:
«Төлегенім (Құман Тастанбеков) алыс жолға кетіп еді, міне, бүгін Бекежаным – Асанәлі ағам да бақилық сапарға аттанды. Олар енді жоғарыда кездесіп, бізге аспандағы жұлдыздай қарап тұратын болады», – деді ол.
Актриса Асанәлі Әшімовтің тек актер ғана емес, біртуар режиссер, дана ұстаз және адал дос болғанын тілге тиек етті. Оның айтуынша, аңыз тұлғаның артында қалдырған рухани мұрасы – жазған кітаптары мен сомдаған рөлдері келешек ұрпақ үшін баға жетпес қазына.
Меруерт Өтекешованың айтуынша, Асанәлі ағаның алдағы үлкен тойға бір жыл жетпей қалғаны өкінішті. Келер жылы М. Әуезов атындағы қазақ ұлттық драма театрының 100 жылдық мерейтойы атап өтілмек еді. «Асанәлі ағаның орнын ешкім баса алмайды», – деп түйіндеді актриса.
Дереккөз: alash.kz
