Қазақстан Республикасы Денсаулық сақтау министрлігі белгілі бір аурулары бар азаматтардың жекелеген санаттарынаарналған тегін және жеңілдікпен берілетін дәрі-дәрмектер мен медициналық бұйымдар тізіміне түзетулер ұсынды.
Бұл туралы 7-su.kz желілік басылымы Ulysmedia.kz сайтының дерегіне сүйеніп хабарлайды .
ТІЗІМГЕ ҚАНДАЙ ПРЕПАРАТТАР ЕНГІЗІЛДІ
Амбулаториялық дәрі-дәрмекпен қамтамасыз ету тізіміне келесі дәрілік заттар қосылды: «Амисульприд», диуретиктермен біріктірілген «Периндоприл», «Гуселькумаб», «Апалутамид» және «Даратумумаб».
ПРЕПАРАТТАР ҚАНДАЙ АУРУЛАРДЫ ЕМДЕУ ҮШІН ҚОЛДАНЫЛАДЫ
-
«Амисульприд» – шизофрения және басқа да психикалық бұзылыстарды емдеуге арналған антипсихотикалық дәрі.
-
Диуретиктермен біріктірілген «Периндоприл» – артериялық гипертензия және жүрек-қан тамырлары ауруларын емдеуге арналған препарат.
-
«Гуселькумаб» – псориазды емдеуге арналған дәрілік зат.
-
«Апалутамид» – онкологиялық ауруларды емдеуде қолданылатын дәрі.
-
«Даратумумаб» – қатерлі ісіктерді емдеуге арналған препарат.
МИНИСТРЛІК НЕ ДЕЙДІ
Денсаулық сақтау министрлігінің түсіндіруінше, бұл препараттардың амбулаториялық дәрі-дәрмекпен қамтамасыз ету тізіміне енгізілуі пациенттерге оларды тегін алуға мүмкіндік береді. Бұл әсіресе созылмалы аурулары бар адамдар үшін аса маңызды.
«Қабылданған шаралар халықтың сапалы медициналық көмекке қолжетімділігін қамтамасыз етуге және денсаулық деңгейін жақсартуға бағытталған», – делінген негіздемеде.
ҚОҒАМДЫҚ ТАЛҚЫЛАУҒА ҚОЙЫЛДЫ
Құжат 1 наурызға дейін қоғамдық талқылау үшін «Ашық НҚА» сайтында орналастырылды.
Фото: Caravan.kz
