Жетісу облысы Қаратал ауданына қарасты Бәйшегір ауылының орталығы — Алмалы елді мекенінде 125-ші ерікті өрт сөндіру пункті ашылды. Жаңа нысанды ашу салтанатына облыстық Төтенше жағдайлар департаментінің басшы құрамы қатысып, лентасын қиды.
Сала басшыларының сөзінше, бұл өрт сөндіру бекетінің басты мақсаты – ауылдық жерлердегі азаматтық қорғау жүйесін нығайтып, төтенше жағдайлар кезінде жедел әрекет ету мүмкіндігін арттыруға бағытталған. «Ауыл құтқарушылары» ведомстволық бағдарламасы аясында тұрғызылған алғашқы нысан. Енді ол Алмалы және оған іргелес елді мекендерде халықтың өмірі мен мүлкін қорғау бағытында қызмет көрсетіп, өрт қауіпсіздігін қамтамасыз етпек.
Қазір аталған өрт сөндіру бекетінде 6 қызметкер бар. Олардың 4-і өрт сөндіруші, 2-і техника жүргізушісі. Жеке құрам арнайы даярлықтан өтіп, өрт пен өзге де төтенше жағдайларға жедел әрі кәсіби түрде әрекет етуге сақадай сай. Жобаға жалпы 13 миллион теңге қаражат жұмсалған. Құрылыс жұмыстарын «Big Story Service» жауапкершілігі шектеулі серіктестігі жүргізген.
Мамандардың мәліметінше, бүгінде Алмалы ауылында 112 отбасы ірге тепкен. Жалпы тұрғындар саны – 760-тан асады. Жаңа өрт сөндіру бекетінің іске қосылуы төтенше жағдайларға әрекет ету уақытын едәуір қысқартып, ауыл тұрғындарының қауіпсіздігін арттыруға мүмкіндік береді. Сонымен қатар, бұл жоба жаңа жұмыс орындарының ашылуына жол ашып, ауданның әлеуметтік-экономикалық дамуына да оң әсерін тигізген.
Айдын КӘЛІМХАН
