№1 мектеп-гимназияда құқықбұзушылықтың алдын алу және құқықтық мәдениетті қалыптастыру мақсатында жастар арасында аудандық деңгейде «Хакатон» форматындағы танымдық сайыс өтті.
Жалпы саны 11 білім ордасынан құралған команда қатысушылары құқықбұзушылықтың алдын алу, буллингпен күрес, жастар арасында құқықтық мәдениетті қалыптастыру тақырыптарында тың идеялар ұсынып, өз жобаларын қорғады. Сонымен қатар, өздерінің құқықтық білімдерін шыңдап, заң талаптары мен азаматтық жауапкершілік туралы мағлұмат алды. Аталған сайыс жастардың заңға құрметпен қарауын арттырып, құқықтық сауаттылықты дамытуға бағытталды.
Жиын барысында оқушыларды қызықтыратын сұрақтарға жауап беріліп, жасөспірімдердің құқықбұзушылығы туралы толық түсінік берілді.
Оқушылар мен жастар арасында құқықтық ойлау қабілетін дамыту, қоғамдық тәртіп пен заңды сақтау мәдениетін насихаттау, жас таланттарды жаңа жобалар арқылы ынталандыруды басты мақсат тұтқан жарыс нәтижесінде І орынды Тасарық орта мектебінің «IQ girls» командасы алса, ІІ орын Қазыбаев орта мектебінің «School Help Team» командасына тиесілі болды. Ал үздік үштікті Жетісу орта мектебінің «Әділет» тобы түйіндеді. Жеңімпаз командалар бағалы сыйлықтар мен Алғыс хаттар иеленіп, мерейлері үстем болды.
Жақсылық ЖОМАРТҰЛЫ
Сарқан ауданы
