Мемлекеттік кеңесші Ерлан Қариннің төрағалығымен Шетелде кадрлар даярлау жөніндегі республикалық комиссияның отырысы өтіп, «Болашақ» стипендиясын иеленген жаңа жеңімпаздар анықталды, – деп хабарлайды 7-su.kz ақпараттық порталы.
Биылғы конкурс қорытындысы бойынша 225 қазақстандық халықаралық стипендия иегері атанды. Іріктеу өте қатаң болды: бір орынға орта есеппен 4 үміткерден келді. Стипендианттардың бөлінісі төмендегідей:
-
152 адам – магистратура;
-
16 адам – докторантура;
-
57 адам – кәсіби тағылымдама.
Сондай-ақ 182 ғалым әлемнің жетекші зерттеу орталықтарында тағылымдамадан өтуге грант алды. Айта кетерлігі, биылдан бастап оқу орындары міндетті түрде халықаралық рейтингтердің үздік жүздігіне енген болуы шарт.
Комиссия отырысында болашаққа бағытталған маңызды шешімдер қабылданды. Соның ішінде 2026 жылдан бастап екі жаңа бағыт пайда болады:
-
Атом энергетикасы: Бұл сала бойынша мамандар даярлауға жыл сайын 20 квота бөлінеді. Бұл отандық атом өнеркәсібін білікті кадрлармен қамтамасыз етуге бағытталған.
-
Жасанды интеллект: «Жасанды интеллект жүйесін пайдаланушылар» деген жаңа санат бекітілді. Бұл елімізді жаппай цифрландыру және экономиканың бәсекеге қабілеттілігін арттыру үшін қажет.
Бағдарлама соңғы жылдары инженерлік-техникалық бағытқа басымдық бере бастады. Жаратылыстану-техникалық мамандықтардың үлесі 2022 жылғы 59,2%–дан 2025 жылы 70%–ға дейін өсті. Ал ғылыми тағылымдамалар бойынша бұл көрсеткіш тіпті 72,4%–ға жетті.
Ерлан Қарин стипендияны іске асыру тетіктерін одан әрі жетілдіру бойынша нақты тапсырмалар берді. «Болашақ» енді тек білім алу емес, мемлекеттің стратегиялық салаларына қажетті нақты мамандарды даярлау құралына айналмақ.
