2025 жыл отандық спорт тарихында ерекше маңызға ие болды. Қазақстандық спортшылар халықаралық додаларда 50-ден астам тарихи жетістікке қол жеткізіп, ел мерейін асқақтатты, – деп хабарлайды 7-su.kz ақпараттық порталы Туризм және спорт министрлігінің ресми мәліметіне сілтеме жасап.
Туризм және спорт министрі Ербол Мырзабосынов жылды қорытындылай келе, биылғы жетістіктердің бұрын-соңды болмаған ауқымда екенін атап өтті.
Спорттық маусымның басты белестеріне тоқталатын болсақ, қысқы спорт түрлерінен шорт-тректен ұлттық құрама Азия ойындарында тұңғыш рет алтын тұғырдан көрінді. Сонымен қатар фристайл-акробатикадан да алғашқы медальдар қоржынға түсті. Жазғы спорт түрлері бойынша семсерлесу, дзюдо, бокс және садақ атудан спортшыларымыз әлемдік рейтингтегі позицияларын нығайтты. Әсіресе, көркем гимнастика мен мәнерлеп сырғанаудан жас таланттардың серпілісі байқалды. Футбол жанкүйерлері үшін де жыл жағымды жаңалықпен басталды: алматылық «Қайрат» клубы өз тарихында тұңғыш рет УЕФА Чемпиондар лигасының негізгі кезеңіне жолдама алып, үлкен сенсация жасады.
Паралимпиадалық қозғалыс бағытында парабиатлоннан жоғары нәтижелер тіркеліп, Қазақстанда алғаш рет Азия Паралимпиялық комитетінің Бас ассамблеясы өтті. Бұл еліміздің Азиядағы инклюзивті спорт орталығы ретіндегі мәртебесін нығайта түсті. Сонымен қатар Қазақстан тек жарыстарға қатысып қана қоймай, ірі турнирлерді өз деңгейінде қабылдады. Бокстан және фристайлдан Әлем кубогі кезеңдері, дзюдодан Grand Slam турнирі Астана мен Алматы қалаларында жоғары деңгейде ұйымдастырылды.
Министрдің айтуынша, бұл нәтижелер – спорттық инфрақұрылымды жақсарту мен спортшыларға көрсетілген жүйелі қолдаудың жемісі. 2026 жылға қойылған мақсаттар бұдан да ауқымды болмақ.
