Өскемен қаласында волейболдан әйелдер командалары арасында өтіп жатқан Қазақстан кубогында ширек финалдық бәсекелер басталды. Күннің алғашқы матчында Талдықорғанның «Жетісу» клубы «Алматы» командасын 3:0 (25:10, 25:13, 25:14) есебімен айқын басымдықпен жеңді, – деп хабарлайды 7-su.kz ақпараттық порталы.
Бұл жеңіс «Жетісу» үшін турнирдің келесі кезеңіне жол ашты. Команда ойын барысында тактикалық сауаттылық пен жоғары дайындық деңгейін көрсетті. Әр сет сайын басымдықты арттырған талдықорғандық арулар қарсыластарына еш мүмкіндік қалдырмады.
Команданың жетекші ойыншысы Мария Фролованың айтуынша, ұжым қазіргі уақытта жоғары спорттық бабында.
«Ширек финалдағы ойынды сенімді жеңіспен аяқтап, келесі кезеңге шықтық. Ойыннан ойынға, күннен күнге өзімізді дамытып, мақсатымыз жолында барымызды салып жатырмыз. Бастысы қарсыласымыздың қандай жағдайда екеніне қарамастан өз ойынымызды көрсетіп, діттегенімізге жету. Бапкердің жоспарын барынша орындап келеміз. Алда бізді маңызды ойындар тұр», – дейді волейболшы.
«Жетісудың» жартылай финалдағы қарсыласы «Қуаныш» (Солтүстік Қазақстан облысы) пен «Қарағанды» жұбының жеңімпазы атанады. Мамандардың пікірінше, бұл ойын турнирдің ең тартысты сәттерінің бірі болмақ. Жерлестеріміздің дайындығы мен қазіргі қарқыны олардың финалға шығу мүмкіндігі жоғары екенін аңғартады.
