Қабылданған шаралардың арқасында облыс тұрғындарына 48 млн. теңгеден аса қаражат қайтарылды. Тұтынушылардың өтінішін талдау бөлшек және элек-трондық сауда салаларында негізгі проблемалардың қатарында шоғырланғанын көрсетті. Бөлшек сауда саласында 221 өтініш тіркелген, оның көбі сатушылардың 14 күн ішінде тауар алмасудан бас тартуына, сондай-ақ, сапасыз өнімді сатуға қатысты болды. Электрондық сауда саласында Kaspi, Wildberries, Ozon және Temu сияқты платформаларға қатысты 115 шағым түскен.
Мемлекеттік бақылау шеңберінде әлеуметтік маңызы бар азық-түлік тауар бағаларына мониторинг жүргізілді. Жоспардан тыс 140 тексеру қорытындысына сәйкес сауда үстемесін арттыруға жол берген және баға белгілемеген 117 кәсіпкерге ескерту жасалды. Ал 14 субъектіге 2 миллион теңгеден аса айыппұл салынған. Инвестиция тарту саласында да оң динамика байқалады. Биылғы жыл басынан 9 кәсіпкерге жалпы 37,9 млн. теңгеге субсидияланатын инвестициялар берілген.
Департаменттің 2026 жылға арналған жоспарларында – әлеуметтік маңызы бар тауарлар тізбесін кеңейту, баға тұрақтылығына бақылауды күшейту және халықтың қаржылық сауаттылығын арттыру бар. Мамандар кәсіпкерлерді заңнама талаптарын сақтауға, ал тұтынушыларды – кез келген транзакция кезінде фискалдық чекті талап етуге және олардың құқықтары бұзылған жағдайда ескерусіз қалдырмауға шақырады.
Облыста тұтынушылардың құқықтарын қорғау және сауда саласының ашықтығын қамтамасыз ету жөніндегі жұмыс жүйелі негізде одан әрі жалғасатын болады.
Айгүл БАЙБОСЫНОВА
