Өңірде халықты жұмыспен қамту, әлеуметтік қолдауға мұқтаж азаматтардың санын азайту, мүгедектігі бар адамдар мен қарттарға сапалы қызмет көрсету негізгі басымдықтардың біріне айналды.
Соңғы 3 жылда облыста барлық сала бойынша 101 мыңнан астам жаңа жұмыс орны құрылды. Атап айтқанда 33 982 адам жұмыспен қамтылды. Соның нәтижесінде жұмыссыздық деңгейі 4,9 пайыздан 4,7 пайызға дейін төмендеді. Тұрақты жұмыспен қамтудың артуы атаулы әлеуметтік көмек алушылар санының да айтарлықтай қысқаруына ықпал етті. Егер бұрын бұл көмек 62,8 мың адамға көрсетілсе, бүгінде олардың саны 19,8 мыңға дейін азайып, 48 пайызға төмендеді.
Өңірде мүгедектігі бар азаматтарды қолдау мәселесіне ерекше көңіл бөлінуде. Облыста 25 мың мүгедектігі бар адам тіркелген. Оның ішінде І топта 2 695, ІІ топта 10 274, ІІІ топта 9 098 адам болса, 18 жасқа дейінгі мүгедек балалар саны 2 988-ді құрайды. Биыл 17749 адам техникалық оңалту құралдарымен қамтылып, қамтамасыз ету деңгейі 94,5 пайызға жетті. Бұл көрсеткіш республикалық орташа деңгейден едәуір жоғары.
Мүгедектігі бар адамдар үшін қолжетімді ортаны қалыптастыру бағытында да нақты нәтижелер бар. Облыс құрылған сәттен бастап 948 нысан бейімделіп, жол картасының орындалуы 83 пайызды құрады. Сонымен қатар, «Инватакси» арнайы автокөліктерінің саны екі есеге артып, 18-ден 32-ге жетті.
Балаларға арналған әлеуметтік қызметтер желісі де кеңейіп келеді. Соңғы 3 жылда мүгедек балаларға арнаулы әлеуметтік қызмет көрсететін 5 орталық ашылды. Алакөл ауданында 6 жастан 18 жасқа дейінгі мүгедектігі бар балаларға арналған 40 орынды сауықтыру жазғы лагерь іске қосылып, жазғы маусымда 160 бала тегін демалды. Талдықорған қаласында аутизм және психикалық дамуында бұзылыстары бар балаларға арналған орталық ашылып, бүгінде 165 балаға қызмет көрсетуде. Қалада, сондай-ақ, мүмкіндігі шектеулі азаматтарға арналған «Асар» спорттық-оңалту кешені жұмыс істеп, 445 адамды қамтып отыр.
Өткен жылы Панфилов ауданы Жаркент қаласында «Мерей» балаларды оңалту орталығы базасында иппотерапия орталығы ашылды. Бұл бірегей жоба аясында 40 бала иппотерапия қызметін алуда.
Ересек жастағы мүгедектігі бар азаматтарға арналған қызметтер де дамып келеді. «Қамқор» арнаулы әлеуметтік қызмет көрсету орталығында 18 жастан асқан адамдарға арналған 50 төсек-орынды бөлімше ашылды. Сонымен қатар, ағымдағы жылы Талдықорған қаласында республикада алғаш рет үйде оңалту қызметтерін көрсету жобасы іске қосылды. Жоба аясында қозғала алмайтын және жұмыс істейтін мүгедектігі бар азаматтарға тегін массаж бен емдік дене шынықтыру қызметтері көрсетіліп, 180 адам қамтылды.
Болашаққа бағытталған ірі жобалардың бірі – Талдықорған қаласында 150 орынды мүгедектігі бар адамдарға арналған оңалту орталығының құрылысы. Жобаның құны 9,6 млрд. теңгені құрайды, ал нысанды 2027 жылдың наурыз айында аяқтау жоспарланған.
Зейнеткерлік жастағы азаматтарға да ерекше көңіл бөлінуде. Облыста «Белсенді ұзақ өмір сүру» орталықтары кезең-кезеңімен енгізілуде. Алғашқы орталық 2024 жылдың қаңтар айында Талдықорғанда ашылып, бүгінде күніне 250-ден астам адамды қабылдайды. Алакөл, Көксу, Панфилов және Сарқан аудандарында осындай орталықтар іске қосылып, күн сайын 600-ге жуық зейнеткерге қызмет көрсетіп отыр.
Жалпы алғанда, облыста әлеуметтік қорғау саласында атқарылған жұмыстар халықтың әл-ауқатын арттыруға, әлеуметтік теңдікті қамтамасыз етуге және өмір сапасын жақсартуға бағытталған нақты іс жүзеге асты.
Ермек Мизамбаев
