Табиғи газға қолжетімділік ең алдымен тұрмыстық жағдайды жақсартып қана қоймай, экологиялық ахуалды оңалтуға, шағын және орта бизнестің дамуына серпін береді. Бұрын көмір мен сұйытылған отынға тәуелді болған ауылдар қазір кезең-кезеңімен көгілдір отынға қосылып, тұрғындар үшін қауіпсіз әрі үнемді энергия көзіне жол ашылуда. Алдағы кезеңде де аймақта газдандыру деңгейін арттыру, жаңа елді мекендерді ретімен көгілдір отынға қосу көзделіп отыр. Бұл өңірдің инвестициялық тартымдылығын күшейтіп, халықтың тұрмыс сапасын жаңа деңгейге көтереді.
Айта кетейік, облыс құрылғанға дейін газ тек 5 елді мекенде болған. Ал жыл соңына қарай 126 елді мекен газға қосылып, көгілдір отын тұтыну көлемі 72%-ға жетпек. Тек биыл және өткен жылы 77 ауыл көгілдір отынға қол жеткізді. Сөйтіп, бүгінде аймақта барлығы 110 елді мекен халқы газдың қызығын көріп, көмір тасу, отын дайындау сияқты машақаттан құтылып отыр.
Ұзындығы 300 шақырымнан асатын, 6 газ тарату стансысы бар «Талдықорған – Үшарал» магистральдық газ құбырының құрылысы аяқталған. Қазір 3 аудандағы 84 ауылға арналған желілер жобалары әзірленуде. Жоспарланған жұмыстар сәтімен жүзеге асырылатын болса, аймақта 2028 жылға дейін Ақсу, Сарқан және Алакөл аудандарын қоса алғанда барлығы 210 елді мекен көгілдір отынға қол жеткізіп, ел қуанышы еселене түспек. Бұл халықтың 93%-ын газға қосуға мүмкіндік береді.
