Қазақстандықтар Жаңа жыл мерекесін жылы ауа райымен қарсы алады, – деп хабарлайды 7-su.kz ақпараттық порталы.
Еліміздің басым бөлігінде суық антициклонның орнын оңтүстіктен келетін жылы циклон басады. Бұл атмосфералық өзгеріс ауа температурасының айтарлықтай көтерілуіне ықпал етпек. Алайда жылымықпен бірге кей өңірлерде құбылмалы ауа райы орнайды. «Қазгидромет» мамандарының дерегінше, 30-31 желтоқсан күндері Ақмола, Павлодар және Қарағанды облыстарында қар жауып, боран соғады. Ал Ұлытау облысының тұрғындары үшін жауын-шашын алдымен жаңбыр түрінде басталып, соңы қарға ұласуы мүмкін.
Елдің оңтүстік аймақтарында күн ашық болып, жауын негізінен жаңбыр түрінде байқалады. Республиканың басым бөлігінде тұман түсіп, жел күшейеді және жолдарда көктайғақ қаупі туындайды. Сондықтан алыс жолға шығатын жүргізушілерге сақтық шараларын сақтау маңызды. Мереке күндері термометр көрсеткіштері жоғарылайды: солтүстік пен орталықта 30 желтоқсанда күндіз ауа температурасы -2…+3°С деңгейіне жетеді. Шығыс аймақтарда 30-31 желтоқсан аралығында күн жылынып, жоғарыдағыдай көрсеткіштер тіркеледі. Оңтүстік өңірлерде ауа райы нағыз көктемдей болады, мұнда сынап бағанасы +5…+15°С жылылықты көрсетеді.
Мамандар жолдағы тайғақ пен көріну деңгейінің төмендеуіне байланысты жаяу жүргіншілер мен көлік иелерін абай болуға шақырады. Мерекелік көңіл-күйіңіз бұзылмас үшін ауа райы болжамы мен өзгерістерін алдын ала ескерген абзал.
