Ұзақ демалыстан кейін қалыпты жұмыс ырғағына оралу көпшілік үшін оңайға соқпайды. Әсіресе, ұйқы режимінің бұзылуы ағзаға үлкен салмақ салады, – деп хабарлайды 7-su.kz ақпараттық порталы Qazaqtoday агенттігіне сілтеме жасап.
Қарағанды медицина университетінің профессоры, невролог Марина Григолашвилидің айтуынша, адамдар демалыс күндері әдеттегіден кеш ұйықтап, кеш ояну арқылы «әлеуметтік джетлагқа» тап болады. Бұл күй уақыт белдеуін ауыстырғанмен бірдей әсер беріп, адамды ашушаңдыққа, тәбеттің бұзылуына және созылмалы шаршауға әкеледі. Маман ұйқыны дәрісіз-ақ қалпына келтірудің 5 тиімді жолын ұсынады:
-
Уақытты біртіндеп жылжыту: Ұйықтау және ояну уақытын күн сайын 15-30 минутқа ертерекке жылжытыңыз. Күрт өзгеру ағза үшін күйзеліс тудыруы мүмкін.
-
Жарық терапиясы: Оянған бойда бөлме пердесін ашып, табиғи жарықтың түсуін қамтамасыз етіңіз. Бұл миға «ояну керек» деген белгі береді.
-
Гаджеттерден бас тарту: Ұйықтар алдында телефон мен теледидарды өшіріп, бөлме ауасын желдетіп алыңыз. Салқын бөлмеде ұйқы сапасы жоғары болады.
-
Ас ішу тәртібі: Кешкі асты ұйқыға 3 сағат қалғанда ішіп бітіру қажет. Сондай-ақ таңғы асты күнделікті бір уақытта ішу биологиялық сағатты реттеуге көмектеседі.
-
Төсекте дөңбекшімеу: Егер 20 минут ішінде ұйқыңыз келмесе, төсектен тұрып, жарықты бәсеңдетіп, тыныш іспен (мысалы, кітап оқу) айналысыңыз. Ұйқы қысқанда ғана қайта жатыңыз.
Дәрігердің айтуынша, режимді толық қалпына келтіру үшін 3-7 күн қажет. Ең бастысы – демалыс күндері де ояну уақытын өзгертпеу. Бұл әдіс ағзаны автоматты түрде белгілі бір уақытта ұйқыға дайындап, жұмыс күндері сергек жүруге септігін тигізеді.
