Жаңа жылдан бастап елімізде су ресурстарын басқару саласында маңызды цифрлық реформа іске қосылды. Енді азаматтар мен кәсіпкерлер арнайы су пайдалануға рұқсатты Су ресурстарының ұлттық ақпараттық жүйесі (СРҰАЖ) арқылы электронды түрде ала алады, – деп хабарлайды 7-su.kz ақпараттық порталы.
Жаңа Су кодексіне сәйкес, мемлекеттік қызмет көрсету қағидаларына тиісті өзгерістер енгізілді. Бизнес-процестерді оңтайландыру мен автоматтандырудың арқасында рұқсат алудың бүкіл циклі қағазбастылықтан арылып, толығымен цифрлық форматқа ауысты. Былтыр су пайдалануға қатысты есеп беру үдерісі де осындай жүйеге көшірілген болатын.
Қазіргі таңда СРҰАЖ өзге 11 мемлекеттік ақпараттық жүйемен интеграцияланған. Су ресурстары және ирригация министрлігі әзірлеген бұл платформа жерүсті және жерасты сулары туралы барлық мәліметті бір жерге жинақтайды. Жүйені өнеркәсіптік деңгейде толық пайдалануға енгізу 2026 жылдың екінші жартысына жоспарланған.
«Жоба Мемлекет басшысы жүктеген міндеттерді орындау аясында жүзеге асырылып жатыр. Ақпараттық жүйеде су ресурстарына қатысты барлық дерек орталықтандырылған түрде жинақталады. Бұл процестерді автоматтандыруға және нақты деректер негізінде басқарушылық шешімдер қабылдауға мүмкіндік береді», – деді Су ресурстары және ирригация министрі Нұржан Нұржігітов.
Бұл жаңашылдық суды пайдаланудың ашықтығын қамтамасыз етіп, мемлекеттік қызмет алу уақытын айтарлықтай қысқартуға септігін тигізеді.
