Б. Құранбек атындағы Журналистер үйінде облыстағы NEET және ауыл жастарын қолдауға бағытталған маңызды жобаның қорытындысы талқыланды. Кездесуде облыстық қоғамдық даму басқармасының басшысы орынбасары Ілияс Түстікбаев пен «Тамшыбұлақ» қоғамдық бірлестігінің төрайымы Жанат Төлемісова баяндама жасап, атқарылған жұмыстар мен қол жеткізілген нәтижелерге кеңінен тоқталды.
Спикерлердің айтуынша, «Жетісу облысында NEET және ауыл жастарымен жұмыс жөніндегі орталықтың қызметін ұйымдастыру» жобасы 2024 жылғы 28 мамыр мен 31 желтоқсан аралығында облыстық Қоғамдық даму басқармасының мемлекеттік әлеуметтік тапсырысы аясында жүзеге асырылған. Жоба «Jetisy jastary» мекемесінің қолдауымен іске асып, Талдықорған қаласындағы Қонаев көшесі, 47-үй, 102-кабинетте орналасқан орталық базасында жұмыс жүргізген.
Жоба аясында аталған орталық өңірдегі NEET және ауыл жастары үшін жүйелі әрі тұрақты қолдау көрсететін сенімді алаңға айналған. Оның негізгі мақсаты – жұмыссыз, оқымайтын және кәсіби бағдарын айқындай алмаған жастарды қоғам өміріне қайта тарту, олардың әлеуетін ашуға мүмкіндік беру болған.
Орталық қызметі барысында NEET-жастарды телефон арқылы хабардар етуге, бос жұмыс орындары, мемлекеттік бағдарламалар мен гранттар туралы жан-жақты ақпарат беруге басымдық жасалған. Сонымен қатар кәсіби бағдар беру, кәсіби және soft skills дағдыларын дамыту, жастарды өңірдің қоғамдық-экономикалық өміріне белсенді араластыру бағытында нақты жұмыстар атқарылды.
Жобаны іске асыру кезеңінде қойылған міндеттер толық орындалған. Атап айтқанда, NEET-жастар тізімі бойынша 12 146 телефон қоңырауы жасалып, оның нәтижесінде 862 жас жұмысқа орналасуға немесе оқуға қызығушылық танытып, бос жұмыс орындары бойынша жеке кеңес алған.
Маусым мен қараша айлары аралығында өңір кәсіпорындары мен ұйымдарынан ұсынылған 1 894 бос жұмыс орнын қамтыған өзекті вакансиялар базасы қалыптастырылған. Жұмыс берушілермен, мемлекеттік бағдарламалармен және мансаптық платформалармен тығыз өзара іс-қимыл нәтижесінде 3 мыңға жуық жас түрлі ресурстар арқылы жұмысқа орналасқан.
Орталық мамандары ақпараттық-түсіндіру және көшпелі жұмыстарға да белсенді атсалысты. Есептік кезеңде олар облыстың 9 ауданы мен Талдықорған қаласында өткен 100-ден астам іс-шараға қатысып, мемлекеттік бағдарламалар мен гранттар туралы мәліметтер қамтылған 2 600-ден астам буклет таратқан.
Жастарды жұмысқа орналастыру мүмкіндіктерін кеңейту мақсатында өңір кәсіпорындары мен ұйымдарымен 100 үшжақты ынтымақтастық меморандумы жасалып, бұдан бөлек, NEET-жастарды еңбек нарығына бейімдеу үшін 102 жеке сүйемелдеу кейсі әзірленген.
Жоба аясында қосымша бағыттарға да айрықша көңіл бөлінді. 2025 жылдың қараша айында Жетісу облысының IT HUB орталығымен бірлесіп мобилография бойынша қысқа мерзімді курстар ұйымдастырылып, оны 33 жас сәтті аяқтаған. Сондай-ақ жастардың өз бетінше табыс табу дағдыларын дамытуға бағытталған 13 мастер-класс өткізілген. Бұл шаралар кулинария, қолөнер, ағаш пен гипстен кәдесый жасау, анимациялық костюмдер дайындау секілді бағыттарды қамтыды.
Жүйелі жұмыстың нәтижесі де айқын. «Jetisy jastary» мемлекеттік мекемесімен бірлескен іс-шаралардың арқасында 2025 жылдың үшінші тоқсанында өңірдегі жұмыссыз жастар саны 7,5 пайызға дейін төмендеп, олардың саны 7 219 адамнан 3 939 адамға дейін қысқарған. Бұл қабылданған шаралардың тиімділігі жоғары болғанын көрсетеді.
Қорыта айтқанда, жасөспірімдерге жол көрсетіп, болар баланың бетін қақпай, керісінше белін буған бұл жоба өңірдегі жастар мәселесін шешуге нақты үлес қосып, жастар саясатын одан әрі дамытуға берік негіз қалады. Бұл бастама – болашағын таба алмай жүрген, Абай атамыз айтқандай «кірпіш дүниенің кетігін тауып, қалана алмай» жүрген жастарға бағыт-бағдар беріп, олардың қоғамдағы орнын айқындауға жол ашқан маңызды қадам.
«Тамшыбұлақ» қоғамдық бірлестігінің төрайымы Жанат Төлемісова:
– NEET және ауыл жастары – қоғамның үлкен әлеуеті. Бұл жоба арқылы біз жастарды тек жұмысқа орналастырумен ғана шектелмей, олардың өз күшіне сенуіне, болашағын жоспарлауына мүмкіндік бердік. Әрбір жаспен жеке жұмыс істеу, бағыт-бағдар беру – орталық қызметінің басты ұстанымы болды. Жүйелі қолдау мен серіктестермен тығыз ынтымақтастықтың арқасында нақты нәтижелерге қол жеткіздік. Алдағы уақытта да жастардың өмірден өз орнын табуына ықпал ететін бастамаларды жалғастыра береміз, – дейді.
Санжар СҰЛТАНҒАЗЫ
