«Адамдар арасындағы қарым – қатынас дәстүрлі наным-сенімге мойынұысбаған соң, салт-дәстүрді сақтамаған соң, тыйым-тосқауыл көрмеген соң еркіндік дегеннің өзі көргенсіздікке ұласқан жайы бар» — дейді Ақселеу Сейдімбек. Ал көргенсіздіктің төркіні әдепсіздік. Әдеп — қай заманда, қандай қоғамда болмасын әрбір ұлттың рухани байлығының көрсеткіші. «Адам ширатылған халық, халық тарқатылған адам» дегенді басшылыққа алсақ әрбір адамның әдебі сол ұлтқа тән қасиет болып саналады.
Осы мақсатта Жетісу облысы әкімі аппаратының Әдеп жөніндегі уәкілі Ғабит Тұрсынбай «Азаматтық қызметші қызметінің әдеп қағидаттары» тақырыбы аясында «Жетісу облысы дін істер басқармасы» мемлекеттік мекемесінің және оған қарасты «Дін саласындағы мәселелерді зерттеу және оңалту орталығы» қызметкерлерімен кездесу өткізді.
Кездесу барысында бірінші Әдеп кодексі және әдеп қағидаттары талқыланды. Ғабит Тұрсынбайұлы әдеп кодексінің маңызды тұстарын атап, қызметкерлердің кәсіби этика мен мінез-құлық ережелерін қалай сақтауы керектігін түсіндірді. Әсіресе, мемлекеттік қызметшілердің азаматтарға қызмет көрсету кезінде адалдық, ашықтық және әділдік қағидаттарын сақтау қажеттілігіне арнайы тоқталды.
Бұрынғы ғұламалар әдеп туралы небір құнды қанатты сөздер қалдырғанын айта келе:
Мысалы, «Әдептілік – арлылық, әдепсіздік – сорлылық», «Әдепсіз келінге — әдемі киім жараспайды» деген сияқты қанатты сөздердің астарында әдеп адамның тәнінің емес, рухы мен жанының киімі. Киім болмаса, ұятты жерлеріміз ашық болып тұратыны секілді, әдеп болмаса, рухымыздағы кейбір ағат мінездері жұртқа көрініп жүреді — деді.
Екінші көтерілген мәселе сыбайлас жемқорлықтың зардабы жайында болды. Сыбайлас жемқорлықтың қоғамға, экономикаға және мемлекетке тигізетін теріс әсерлері туралы сөз қозғалып, оның алдын алу жолдары талқыланды.
— Армандағанымды ала қояйын деп арсыздыққа баратындар, қызметін пайдаланып қолы жеткен жерге дейін құрығын созып қарпып қалғысы келетіндер әлі де арамызда бар. Нәтижесінде дүниеге деген құмарлық жеңіп, адамға деген сүйіспеншілік жеңіліп, ақылға деген қажеттілік жерленеді. Абайдың: «Махаббатсыз дүние дос, хайуанға оның қосыңдар» дегенінің астарында осы дүние жатыр — деп сөзін түйіндеді шара тізгіншісі.
Мұндай кездесулер әдептілікті қалыптастырып, сыбайлас жемқорлыққа қарсы күресті күшейтуге және мемлекеттік қызметшілердің жауапкершілігін арттыруға ықпал етеді. Кездесу барысында сұрақтарға жауап беріліп, мемлекеттік қызметтің этикалық аспектілері тереңірек түсіндірілді.
