Жаңа жыл мен Рождество мерекелері кезінде халықтың қауіпсіздігін қамтамасыз ету мақсатында төтенше жағдайлар департаменті мен полиция қызметінің жеке құрамы ерекше дайындықта болды. Осы кезеңдегі ахуал туралы Журналистер үйінде өткен брифингте кеңінен айтылды, – деп хабарлайды 7-su.kz ақпараттық порталы.
ТЖД мәліметінше, 31 желтоқсан мен 2 қаңтар аралығында облыс аумағында ірі ауқымды төтенше жағдайлар тіркелмеген. Дегенмен, мереке күндері өрт оқиғалары толықтай орын алмай қалған жоқ. Өкінішке қарай, 2 қаңтар күні Кербұлақ ауданында адам өліміне әкеп соққан жағдай орын алды.
Сарыбастау ауылдық округіне қарасты мал қыстауында шыққан өрт салдарынан бір адам қаза тапты. Ал Рождество мерекесі кезінде Талдықорған қаласында құтқарушылардың жедел әрекетінің арқасында үлкен апаттың беті қайтарылды. Қаратал ықшамауданындағы көпқабатты үйлердің бірінде шыққан өрт кезінде 8 адам аман қалды.
«Өрт кезінде 8 адам құтқарылды, оның жетеуі – кішкентай балалар. Құтқарушылардың кәсібилігі мен уақытылы жеткенінің арқасында балалар зардап шеккен жоқ», – деп атап өтті ТЖД төтенше жағдайлардың алдын алу басқармасының бастығы, азаматтық қорғау подполковнигі Ринат Тазабеков.
Жаңа жыл түні көшелердегі тәртіп пен жол қауіпсіздігін күзетуге 687 полиция қызметкері мен 95 қызметтік автокөлік жұмылдырылды. Тәртіп сақшылары адамдар көп жиналатын алаңдарды, стратегиялық нысандарды және қаланың басты көлік жолдарын тәулік бойы бақылауда ұстады.
Мереке күндері пиротехникалық бұйымдарды заңсыз пайдалану мен қауіпсіздік ережелерін сақтамауға қатысты рейдтер жүргізілді. Нәтижесінде:
-
Пиротехниканы қолдану талаптарын бұзған 80 әкімшілік құқықбұзушылық анықталды;
-
Рұқсат етілмеген орындарда отшашу атқан тұлғаларға айыппұл салынды;
-
Тұрғындар арасында түсіндіру жұмыстары жүргізілді.
Төтенше жағдайлар қызметі мен полиция департаментінің бірлескен жұмысының арқасында өңірдегі қоғамдық-саяси ахуал тұрақты сақталды. Қабылданған кешенді шаралар жаппай тәртіпсіздіктер мен жол-көлік оқиғаларының алдын алуға мүмкіндік берді.
Мамандар мереке аяқталғанымен, қысқы кезеңдегі өрт қауіпсіздігі мен жылу жүйелерін пайдалану кезіндегі сақтық шараларын ұмытпауды ескертеді. Әсіресе, жеке сектордағы пеш жағу ережелерін сақтау – қайғылы жағдайларды болдырмаудың бірден-бір жолы.
