Жетісу облысында ерекше қажеттіліктері бар балаларды қолдау және оңалту жұмыстары жаңа деңгейге көтеріліп келеді, – деп хабарлайды 7-su.kz ақпараттық порталы.
Бүгінгі таңда өңірде балаларды оңалту қызметімен айналысатын 9 мекеме тұрақты жұмыс істеп тұр. Бұл орталықтарда жыл сайын 1,5 жастан 18 жасқа дейінгі 800-дей бала білікті мамандардың көмегіне жүгініп, денсаулықтарын нығайтуда. Осы мекемелердің ішінде шоқтығы биік, өңірдегі әзірге жалғыз бірегей жоба – Иппотерапия орталығы.
Резиденциядан оңалту орталығына дейін
Иппотерапия орталығы Панфилов ауданы, Жаркент қаласында орналасқан «Мерей» балаларды оңалту орталығының базасында ашылды. Айта кетерлік жайт, бұл ғимарат бұрын облыс әкімінің резиденциясы болған. Өңір басшылығының шешімімен ғимарат балалардың игілігіне беріліп, арнайы бейімдеуден өтті. Қазіргі таңда мұнда заманауи құрал-жабдықтар орнатылып, балалардың жайлылығы мен қауіпсіздігі үшін барлық жағдай жасалған.
Жылқымен емдеу: 7 баланың жағдайы жақсарды
Орталықта қазіргі уақытта 40 бала оңалту шараларын қабылдауда. Олардың басым бөлігі, атап айтқанда 33 бала иппотерапия сабақтарына белсенді қатысады. Бір жыл ішіндегі жұмыс нәтижесі көңіл қуантады: 7 баланың денсаулығында айтарлықтай ілгерілеушілік бар.
«Мерей» балаларды оңалту орталығы директорының орынбасары Ардақ Бақытқызының айтуынша, иппотерапия тек физикалық емес, психологиялық тұрғыдан да үлкен әсер береді.
«Бір жыл ішінде үш баланың психоэмоциялық көңіл күйі тұрақталды, төрт баланың тірек-қимыл жүйесінің жұмысы жақсарды. Жылқының балаларға беретін энергиясы зор. Сабақтар аптасына 2-3 рет ауданы 400 шаршы метр болатын жабық аренада өткізіледі», – дейді маман.
Иппотерапияның негізгі пайдасы:
- Аяққа тұруға және жүру дағдыларын дамытуға көмектеседі;
- Арқа бұлшық еттерін нығайтады;
- Вестибулярлық аппаратты жаттықтырады;
- Баланың жалпы дамуына оң әсер етіп, өзіне деген сенімділігін арттырады.
Кешенді оңалтудың сегіз бағыты
Орталықта тек атқа міну емес, жалпы саны сегіз бағыт бойынша сауықтыру емі жүргізіледі. Тірек-қимыл аппараты бұзылған және жүйке жүйесінде ауытқулары бар балалар үшін мынадай қызметтер қарастырылған:
- Бассейн және гидромассаж;
- Физиотерапия және емдік дене шынықтыру (ЕДШ);
- Тұз шахтасы мен еңбек терапиясы;
- Массаж және емдеу кабинеттері.
Мұнда 55 білікті маман еңбек етеді. Сондай-ақ, алыс-жақын жерден келетін балаларды тасымалдау мәселесі де шешілген – мекеменің меншігінде арнайы автобус бар.
