Қазақстанның Су ресурстары және ирригация министрлігі 2025 жылға арналған сумен жабдықтау нысандарын салу және қайта жаңарту жоспарын мерзімінен бұрын асыра орындады, – деп хабарлайды 7-su.kz ақпараттық порталы.
Үкімет отырысында ведомство басшысы Нұржан Нұржігітов елдің су саласындағы ауқымды өзгерістер туралы баяндама жасады. Өткен жылы министрлік республиканың 9 өңірінде 30 жобаны іске асырды. Жоспар бойынша 9 нысан тапсырылуы тиіс болса, іс жүзінде 15 жоба аяқталған. Бұл көрсеткіш белгіленген межеден едәуір жоғары. Жұмыс нәтижесінде 1599 км су құбыры желісі тартылып, 8 ірі су нысаны салынды. Осының арқасында 277 елді мекеннің сумен қамту жағдайы жақсарып, 514 мың адам сапалы ауызсуға қол жеткізді. Оның ішінде 73 ауылдың 115,5 мың тұрғыны алғаш рет орталықтандырылған су жүйесіне қосылды.
Министрлік тек инфрақұрылымды ғана емес, суды тиімді пайдалану технологияларын да белсенді енгізуде. Аграрлық секторда су үнемдеу технологиялары қолданылатын жер көлемі 543,5 мың гектарға жетті. Бұл көрсеткішті 2030 жылға қарай 1,3 млн гектарға дейін ұлғайту көзделген. Осы мақсатқа қол жеткізу үшін алдағы үш жылға 228 млрд теңге қаражат бөлінді, бұл бұрынғы бюджеттен төрт есе көп. Сонымен қатар, елде 4 мыңнан астам кен орны барланған жерасты суларын тиімді игеру үшін арнайы тұжырымдама әзірленіп жатыр. Цифрландыру бағытында шаруалармен келісімшарттар электронды форматқа көшірілуде. Жаңа биллинг жүйесі суды есепке алудағы адами факторды жойып, ашықтықты қамтамасыз етеді.
Судың «қара нарығына» қарсы күрес мақсатында Бас прокуратурамен бірлесіп арнайы ведомствоаралық жұмыс тобы құрылды. Жаңа Су кодексі бойынша өнеркәсіптік кәсіпорындарға суды қайталама пайдалану жүйесіне көшу үшін 7 жыл уақыт берілді. Бұл 2030 жылға қарай 1,5 млрд текше метр суды үнемдеуге мүмкіндік береді. Биыл тағы 12 жобаны аяқтап, 142 ауылдың 540 мың тұрғынын сумен қамту жоспарланып отыр. Оңтүстік өңірлерде су тапшылығы қаупі бар екенін ескеріп, министрлік қазірден бастап суару каналдарын жөндеуге және фермерлерге ылғалды аз қажет ететін дақылдарға көшуді түсіндіруге кірісті.
