Жетісу облысына жұмыс сапарымен келген ҚР Парламенті Мәжілісінің депутаты, Қаржы және бюджет комитетінің мүшесі Наурыз Сайлаубай Талдықорған қаласындағы 21751 әскери бөлімге арнайы барды.
Алдымен әскери бөлімге аты берілген, ІІ мәрте Кеңес Одағының Батыры Сергей Луганскийдің ескерткішіне гүл шоқтарын қою рәсіміне қатысқан депутат ел қорғау жолында ерлік көрсеткен батырдың ерлігі жас ұрпаққа үлгі екенін атап өтті.
Сапар барысында әскери бөлімнің күнделікті қызметімен және тыныс-тіршілігімен танысқан халық қалаулысы жеке құраммен жүздесіп, мазмұнды әрі ашық әңгіме өрбітті. Басқосуда негізінен әскери қызметшілердің жалақысы, әлеуметтік жағдайы және тұрғын үймен қамтамасыз ету мәселелері көтерілді. Осы бағыттар бойынша қолданыстағы тетіктердің тиімділігі талқыланып, заңнамаға енгізілуі мүмкін өзгерістер жөнінде пікір айтылды.
– Әскерилердің әлеуметтік жағдайы ел қауіпсіздігінің берік негізі. Сондықтан жалақы, тұрғын үймен қамтамасыз ету және қызметтік кепілдіктер мәселесі әрдайым Парламент назарында. Ұсыныс-пікірлеріңіз заңнаманы жетілдіру барысында міндетті түрде ескеріледі, – деген депутат Наурыз Сайлаубай мерзімді әскери борышын өтеп жүрген сарбаздарды толғандырған ойларын да тыңдады.
Депутат жас сарбаздарға алдағы қызметтеріне сәттілік тілеп, ел қауіпсіздігін қамтамасыз ету жолындағы адал еңбектеріне ризашылығын білдірді.
Жетісу гарнизонының баспасөз қызметі
