2025 жылы «Самұрық-Қазына» компаниялар тобы жүзеге асырған әлеуметтік жобалар аясында аймақтардағы мұқтаж отбасылардан бастап, ерекше қажеттіліктері бар балаларға дейін 1 млн астам отандасымыз қолдау тапты, – деп хабарлайды 7-su.kz ақпараттық порталы Kazinform агенттігіне сілтеме жасап.
Холдинг жұмысының негізгі бағыттарының бірі – корпоративтік әлеуметтік жауапкершілік. Бұл ретте басымдық балалар денсаулығы, инклюзия, медицина және бұқаралық спортты дамытуға берілген. Ерекше балаларға арналған оңалту орталықтары, мектептердегі инклюзивті сыныптар, аймақтардағы жаңа спорт залдары мен шалғай ауылдарға жететін білікті дәрігерлер көмегі – мұның барлығы «Самұрық-Қазына» АҚ Samruk-Kazyna Trust қоры арқылы орындайтын бағдарламалардың бір бөлігі.
Тек 2025 жылдың ішінде 12.5 млрд теңге сомасына 39 әлеуметтік жобаға қолдау көрсетілді. Бүгінде республика бойынша 55 оңалту орталығы жұмыс істейді. Онда жыл сайын 21 мыңға жуық бала кешенді көмек алады. Сонымен қатар Астана қаласы, Ақмола және Атырау облыстарының мектептерінде былтыр 17 инклюзияны қолдау кабинеті ашылды. Қазіргі таңда олардың жалпы саны 31-ге жетіп, 2000-нан астам баланың сапалы білім алуына жағдай жасалды.
Алыс елді мекендерде тұратын халықтың денсаулығына ерекше көңіл бөлінуде. «Саламатты Қазақстан» медициналық-құқықтық пойызы бір жыл ішінде 123 шалғай ауылды аралады. Нәтижесінде 100 мыңнан астам ауыл тұрғыны дәрігерлердің тегін қабылдауында болып, кәсіби заңгерлік кеңестер алды. Бұл бастама медициналық қызметтің қолжетімділігін арттырып, халықтың әлеуметтік жағдайын жақсартуға септігін тигізеді.
Бұқаралық спортты дамыту да басты назарда қалып отыр. Соңғы бес жылда еліміздің түкпір-түкпірінде, атап айтқанда Ақмола облысынан Маңғыстауға дейінгі аймақтарда 18 спорт кешені бой көтерді. Осының арқасында 740 мың ауыл тұрғыны, әсіресе балалар мен жасөспірімдер спортпен тұрақты айналысуға мүмкіндік алды.
«Самұрық-Қазына» АҚ басқарма төрағасы Нұрлан Жақыповтың айтуынша, холдингтің әлеуметтік жобалары – бұл есеп беру үшін емес, ел болашағы үшін жасалған инвестиция. «Біз үшін әлеуметтік жауапкершілік – жүйелі жұмыс. Адамдардың, әсіресе балалардың өмірін нақты өзгертетін жобаларды қолдауды жалғастырамыз», – деп атап өтті ол.
Холдинг өкілдері әлеуметтік бастамалар алдағы уақытта да кеңейе түсетінін жеткізді.
