Облыста балық ресурстарын сақтау және молайту бойынша жүйелі жұмыс жалғасуда.
Өткен жылы мемлекеттік тапсырыс шеңберінде аймақтағы су айдындарын балықтандыру бойынша ауқымды іс-шаралар өткізілді. Балықтар мен басқа да су жануарларының популяциясын толықтыру мақсатында 500 мыңға жуық тұқы шабақтары шығарылды. Жалпы, облыстың су айдындарында балық түрлерінің 891 мыңнан аса шабақтары қоныстанған. Биологиялық ресурстарды ұтымды пайдалану мақсатында аймақтың су айдындары бойынша 2,2 мың тоннадан аса көлемде балық аулауға лимит белгіленді.
Жыл соңындағы жағдай бойынша нақты аулау 800 тоннадан асты. Браконьерлікпен күреске және табиғат қорғау заңнамасының сақталуын қамтамасыз етуге ерекше назар аударылады. Былтыр облыс аумағында 91 бұзушылық дерегі анықталып, 86 жеке тұлға әкімшілік жауапкершілікке тартылды. Инспекция материалдары бойынша құқық қорғау органдары 5 қылмыстық іс қозғады, сот шешімдерінің қорытындысына сәйкес 2 адам қылмыстық жауапкершілікке тартылды.
Сонымен бірге заңсыз ауланған 1 тоннадан астам балық тәркіленді. Балық шаруашылығын дамытудың 2021-2030 жылдарға арналған бағдарламасын іске асыру шеңберінде аймақта 700 тоннадан астам тауарлық балық өндірілді. Аквамәдениетті дамытуды ынталандыру және балық өсіру шаруашылықтарын қолдау үшін жалпы сомасы 40 млн. теңгеге мемлекеттік субсидиялар көзделген.
Айта кетейік, өткен жылы балық шаруашылығын кешенді және орнықты дамытуға бағытталған «Аквамәдениет туралы» Қазақстан Республикасының жаңа Заңы қабылданды. Қабылданған шаралар өндіріс көлемін ұлғайту, заманауи технологияларды енгізу және саланың экологиялық қауіпсіздігін қамтамасыз ету үшін жаңа мүмкіндіктер ашады.
А. БАЙЖҰМАҚЫЗЫ
