Тоқаев: Көк Туды мақтанышпен желбіреткен азаматтарды барынша қолдау керек

Қызылордада өтіп жатқан Ұлттық құрылтайдың V отырысында Мемлекет басшысы Қасым-Жомарт Тоқаев отаншылдық құндылықтары мен мемлекеттік рәміздерді қолдану мәдениеті туралы маңызды мәлімдеме жасады, – деп хабарлайды 7-su.kz ақпараттық порталы.

Президенттің пікірінше, Отаншылдық дегеніміз – Отанға деген сүйіспеншілік деген сөз.

«Алайда Отан алдындағы жауапкершілігіңді сезініп, перзенттік парызыңды өтеуге талпынбасаң, «отаншылмын, патриотпын» деген сөзіңнің құны көк тиын болмақ. Қазір қоғамда «Қазақстанның мемлекеттік Туын қайда және қашан қолданған жөн?» деген маңызды мәселе талқыланып жатыр. Бұл мәселе арнайы нормалармен және ережелермен реттеледі. Мемлекеттік рәміздерді пайдалануға жеңіл-желпі, салғырт қарауға болмайды. Заң талабы әрдайым орындалуға тиіс. Дегенмен, ең алдымен, заңның түпкі мәнін терең түсіну керек. Мемлекеттік рәміздерді қадірлеп, оларды жөнімен пайдаланатын отаншыл азаматтарды барынша қолдау қажет», – деді Тоқаев.

Қасым-Жомарт Тоқаев үйлерде, көліктерде, көшелерде, сондай-ақ, еліміздегі, шетелдегі спорттық және іс-шараларда көк Туымыз желбіреп тұрғанда қуанып қалатынын жеткізді.

«Сол арқылы еліміздің азаматтары бірлігі бекем ұлт екенімізді көрсетеді. Олардың әрекеттерінен туған елін мақтан тұтатыны байқалып тұрады», – деді Президент.