Қазақстан АҚШ президенті Дональд Трамптың бастамасымен құрылған Бейбітшілік кеңесінің ресми қатысушысы атанды. Еліміз ұйым жарғысында көрсетілген 1 млрд доллар көлеміндегі ерікті жарнаны төлемей-ақ мүшелікке қабылданды, – деп хабарлайды 7-su.kz ақпараттық порталы.
Көпшіліктің талқысына түскен 1 млрд доллар мәселесіне қатысты Президент әкімшілігі нақты түсініктеме берді. Ресми мәлімет бойынша, бұл қаражат ұйымға мүше болудың міндетті шарты емес. Кеңеске кіру әр мемлекеттің өз еркіне негізделген егеменді шешімі.
Жарғының ережелеріне сәйкес, жарна төлеген елдерге ұйым құрамында болу мерзімін үш жылдық кезеңнен асырып, тұрақты негізде ұзарту мүмкіндігі беріледі. Ал Қазақстан бұл кеңеске ешқандай қаржылық міндеттемесіз кіріп, өзінің халықаралық аренадағы бейбітшілік сүйгіш позициясын тағы бір мәрте айқындады.
Бұл халықаралық құрылым Газа секторындағы жағдайды реттеу және аймақты қалпына келтіру мақсатында құрылған. Қазіргі уақытта ұйым құрамында Қазақстаннан бөлек Түркия, Сауд Арабиясы, Әзербайжан, Армения сынды 18 мемлекет бар. Ақ үй өкілдерінің айтуынша, жиналған ерікті жарналар тікелей қақтығыстан зардап шеккен аймақтардың инфрақұрылымын жаңғыртуға жұмсалмақ.
Кеңес құрамына АҚШ-тың жоғары лауазымды шенеуніктері, атап айтқанда мемлекеттік хатшы Марко Рубио мен Трамптың арнайы өкілі Стив Уиткофф енді. Бұл құрылым тек қаржылық емес, сонымен қатар гуманитарлық және дипломатиялық мәселелерді шешуге бағытталған маңызды орган ретінде қарастырылады.
