Жетісу облысының прокуратурасы қылмыстың алдын алу мақсатында шартты түрде мерзімінен бұрын босатылған (ШТМБ) тұлғаларды қоғамға бейімдеу жұмыстарын жандандырды. Қаратал ауданында іске асырылған нақты жобалар азаматтардың қайта қылмыс жасауына жол бермей, олардың тұрмысын жақсартуға бағытталған, – деп хабарлайды 7-su.kz ақпараттық порталы.
Аудан прокуратурасы мен жергілікті меценаттардың қолдауымен ШТМБ бойынша босатылған, алты бала тәрбиелеп отырған көпбалалы ана Ш-ның баспана мәселесі оң шешімін тапты. Оған жеке меншік құқығымен үш бөлмелі абаттандырылған үй берілді.
Бұл қадам:
-
Кәмелетке толмаған балалардың құқығын қорғауға;
-
Ананың қоғамға тез араласуына;
-
Отбасының әлеуметтік тұрақтылығын нығайтуға мүмкіндік берді.
Пробация қызметінің бақылауындағы тағы бір азамат К-ға өз ісін ашуға қолдау көрсетілді. Аудан прокуратурасының бастамасымен оған дәнекерлеу цехын ашу үшін 1,5 млн теңгеден астам қайтарымсыз грант бөлінді. Қазіргі таңда азамат жеке кәсібін дөңгелетіп, отбасын тұрақты табыспен қамтамасыз етіп отыр.
Жетісу облысының прокуратурасы атап өткендей, жазасын өтеп шыққан тұлғаларды жұмыспен және үймен қамту – рецидивті (қайталама қылмысты) азайтудың ең тиімді жолы. Азаматтардың өмірлік қиындықтарына мемлекет пен қоғам болып көмектесу – «Әділетті Қазақстанның» басты қағидаттарының бірі.
