Талдықорған футболының түлегі, «Оле Бразил» жобасының қатысушысы, «Астана» сапында ел чемпионы болған (2017), «Жетісу», «Оқжетпес» (Көкшетау), «Ақжайық» (Орал), «Шахтер» (Қарағанды), «Қызылжар», «Тараз», «Елімай» (Семей) сынды командаларда ойнаған 31 жастағы футболшы Берік Шайықов «Жетісу» футзал клубында ойнауы мүмкін, – деп хабарлайды 7-su.kz ақпараттық порталы.
Берік Шайықов былтырғы маусымды «Жетісу» футбол клубында өткізді. Кей ойынға капитан есебінде команданы бастап та шықты. Қорғаушы өткен маусымда 11 ойынға қатысып, 1 ескерту қағазын алды. Әйгілі transfer.markt сайты Шайықовты 70 мың еуроға бағалаған (2025 жыл, қараша).
«Жетісу» футбол клубы жаңа маусымға дайындықты бастап кетті. Қайрат Нұрдәулетов жаттықтыратын команда екі оқу-жаттығу жиынын Алматыда өткізді. Іріктеуге қатысқандар ішінде Берік Шайықов болмады. Қазақстан жастар құрамасында ойнаған Берік Шайықов енді өз қарым-қабілетін футзалда көрсетуге ниетті. Ал «Жетісу» футзал клубы болса ел чемпионатындағы алғашқы айналымда 12 команданың ішінде 10 ұпаймен 11-орында аяқтады. Екінші айналым ақпанда басталады. Дәл қазір футзалда ауыс-түйіс ашық.
