Экология – тек сенбілік пен қоқыс жинау ғана емес. Ол – ойлау, әрекет ету, жауапкершілік алу. Осы ұстанымды алға тартқан «Eco IT: Тазалыққа жол!» атты экологиялық хакатон Жетісу жастарын бір ортаға тоғыстырды.
Жастардың экологиялық мәдениетін арттыруды, қоршаған ортаны қорғау бағытындағы өзекті мәселелерге заманауи әрі тиімді шешімдер ұсынуға мүмкіндік беруді мақсат еткен шараға өңірдегі жоғары оқу орындары мен колледждерден 10-ға жуық команда қатысып, экологияға қатысты жобаларын қазылар алқасының талқысына ұсынды.
Шара барысында жастар экологиялық мәселелерге IT технологиялар мен креативті ойлау арқылы шешім шығару жолдарын таныстырды. Командалар табиғатты қорғау, тазалық мәдениетін қалыптастыру, жауапты тұтыну бағытында нақты жобаларға қатысты шығару жолдарын таныстырып, өз идеяларын қорғады.
Кездесуде сөз сөйлейтін спикерлер экологиялық мәдениетті қалыптастырудың маңызын атап өтті.
«Алтын Адам креатив центр» қоғамдық бірлестігінің жетекшісі Динара Бакирова экологиялық ойлаудың заманауи форматта дамуы қажеттігін айта келіп:
– Экология – тек тазалық мәселесі емес, ол – ойлау жүйесі. Жастардың IT мен креативті идеяларды пайдалана отырып экологиялық шешімдер ұсынуы – болашаққа жасалған маңызды қадам, – деді.
Облыстың студенттік омбудсмені Ақерке Қызайбай жастар белсенділігінің рөліне тоқталды.
– Осындай жиындар жастарды бейжай қалдырмай, нақты әрекетке жетелейді. Әрбір экологиялық бастама – қоғам алдындағы азаматтық жауапкершіліктің көрінісі, – деп атап өтті.
Хакатон қорытындысында үздік жобалар анықталып, І, ІІ, ІІІ орын алған командалар дипломдармен және арнайы сыйлықтармен марапатталды. Барлық қатысушыға Алғыс хат табысталды. Бірақ бұл шараның басты нәтижесі жүлде емес, жастардың экологияға деген көзқарасы өзгеріп, «таза орта өз қолымызда» деген ойдың нығаюы.
Қажет АНДАС
