«Заң мен тәртіп» идеологиясы аясында «Жетісу жастары» орталығында «Құқықтық білім – жастар таңдауы» тақырыбында ашық диалог алаңы өтті.
Іс-шараға 100-ге жуық жас жиналып, құқық қорғау органдары өкілдерімен еркін форматта пікір алмасты. Ашық диалогтың басты мақсаты – жастардың құқықтық білімін арттыру, заң талаптарын терең түсіндіру, құқық бұзушылықтың алдын алу бағытында түсіндіру жұмыстарын жүргізу.
Кездесуді «Жетісу жастары» КММ директорының орынбасары Арнай Байжұрынов жүргізді. Модератор жастарды белсенділікке шақырып, іс-шараның маңыздылығына тоқталды.
Талдықорған қаласы прокуратурасының сотқа дейінгі тергеп-тексерудің заңдылығын қадағалау және қылмыстық қудалау бөлімінің бастығы Иманнәсіп Қорабаев, бөлім прокуроры Арайлым Қаулыбек жастарға қылмыстық және әкімшілік жауапкершілік, азаматтардың құқықтары мен міндеттері туралы жан-жақты ақпарат берді.
Шарада сотқа дейінгі тергеп-тексеру барысының заңдылығы, қылмыстық қудалау тәртібі, азаматтардың құқықтарының сақталуы, заң бұзушылықтың салдары кеңінен талқыланды. Сонымен қатар, жастар арасында жиі кездесетін құқық бұзушылық түрлеріне тоқталып, алдын алу жолдарын түсіндірді.
Іс-шара ашық микрофон форматында өтті. Жастар заң саласына қатысты өздерін мазалаған сұрақтарды тікелей құқық қорғау органдарының өкілдеріне қою мүмкіндігіне ие болды. Атап айтқанда, қатысушылар кибербуллинг, әлеуметтік желідегі қорлау мен жала жабу, төбелес пен бұзақылық үшін жауапкершілік, алаяқтық, ұрлық, есірткіге қатысты құқықтық жауапкершілік, кәмелетке толмағандардың қылмыстық жауаптылығы жөнінде сұрақтар қойды.
Жастар «Құқық бұзушылық жасаған жағдайда қандай жауапкершілік қарастырылады?», «Тергеу кезінде азаматтың қандай құқықтары бар?», «Айыпталушы мен куәгердің айырмашылығы неде?», «Заңсыз ұстау немесе қысым көрсетілген жағдайда қайда жүгінуге болады?» деген нақты сауал қойды. Спикерлер әрбір сұраққа заң аясында толық әрі түсінікті жауап беріп, жастардың құқықтық сауаттылығын арттыруға ерекше мән берді.
Диалог барысында жастардың заңға деген қызығушылығы мен белсенділігі жоғары болғаны байқалды. Қатысушылар өз пікірлерін ашық білдіріп, өмірде кездесетін жағдайлар бойынша кеңес алды. Мұндай ашық формат жастар мен құқық қорғау органдары арасындағы сенімді нығайтып, құқықтық мәдениетті қалыптастыруға оң әсер ететінін айтты.
Шара соңында қатысушылар арасында құқықтық тақырыпта ойын ұйымдастырылды. Белсенділік танытып, жоғары нәтиже көрсеткен жеңімпаздар дипломмен марапатталды.
Ашық диалог алаңы жастардың құқықтық білімін арттыруға, заңға құрметпен қарауға, азаматтық жауапкершілікті сезінуге бағытталған маңызды іс-шара ретінде жоғары деңгейде өтті. Ұйымдастырушылар алдағы уақытта да осындай мазмұнды кездесулерді тұрақты түрде өткізілетінін айтты.
Айдана АМАНЖОЛҚЫЗЫ
ЖУ СТУДЕНТІ
