Астанада Конституциялық реформа жөніндегі комиссияның алғашқы отырысы өтуде. Бұл жиын еліміздің саяси жүйесін түбегейлі жаңғырту жолындағы маңызды қадам, – деп хабарлайды 7-su.kz ақпараттық порталы.
Мемлекет басшысы Қасым-Жомарт Тоқаев 2025 жылғы 8 қыркүйектегі «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты халыққа Жолдауында еліміздің әлеуметтік-экономикалық дамуына серпін беретін жаңа саяси реформаларды жариялаған болатын. Осы бастамаларды заңнамалық тұрғыда пысықтау үшін құрылған комиссияға Конституциялық соттың төрағасы Эльвира Азимова жетекшілік етеді. Комиссия төрағасының орынбасарлары болып Мемлекеттік кеңесші Ерлан Қарин мен Премьер-министрдің орынбасары – Мәдениет және ақпарат министрі Аида Балаева бекітілді.
Эльвира Азимованың айтуынша, Конституциялық комиссияның алдында айрықша миссия тұр. Негізгі мақсат – «Күшті Президент – ықпалды Парламент – есеп беретін Үкімет» тұжырымдамасы негізінде елімізде бір палаталы Парламент – Құрылтай құру. Бұл реформа заң шығарушы биліктің тиімділігін арттырып, шешім қабылдау үдерісін жеделдетуге бағытталған. Сонымен қатар, билік тармақтары арасындағы тепе-теңдікті сақтау үшін Вице-Президент лауазымын енгізу және Халық кеңесін құру мәселелері де күн тәртібінде тұр.
Айта кетерлігі, бұл өзгерістер тек мемлекеттік органдардың ішінде ғана емес, жалпы қоғам арасында кең қолдау тауып отыр. 2025 жылғы қазан айынан бастап жұмыс істеген арнайы топқа азаматтардан 2 мыңнан астам ұсыныс келіп түскен. Бұл халықтың саяси трансформацияға бейжай қарамайтынын және мемлекетті басқару ісіне араласуға дайын екенін көрсетеді. Комиссия құрамына Парламент депутаттары, мәслихаттар төрағалары, БАҚ өкілдері, қоғам қайраткерлері мен өңірлердегі қоғамдық кеңес мүшелерінің енуі – реформаның ашықтығы мен демократиялық сипатын айқындай түседі.
«Конституциялық комиссияның құрылуын салалық өзгерістерден кешенді конституциялық трансформацияға өту ретінде қарастырған жөн», – деп атап өтті Эльвира Азимова. Жаңа реформалар цифрлық дәуірдің сын-қатерлеріне төтеп бере алатын, икемді әрі халық үніне құлақ асатын мемлекеттік модель қалыптастыруды көздейді. Комиссия мүшелерінің кәсіби тәжірибесі мен сарапшылардың пікірі алдағы уақытта Ата заңға енгізілетін өзгерістердің сапалы әрі негізді болуын қамтамасыз етеді. Саяси жаңғырудың бұл кезеңі Қазақстанның институционалдық тұрақтылығын нығайтып, қоғамның мемлекеттік басқаруға қатысу мүмкіндігін кеңейтеді.
