Белгілі дінтанушы әрі уағызшы Данияр Кенжеұлы әлеуметтік желідегі парақшасында танымал имам, теолог Нұрлан қажы Асановқа қатысты өткір сын білдіріп, оның уағыз айту стилі мен пәтуаларына наразылық танытты, – деп хабарлайды 7-su.kz ақпараттық порталы Ozgeris.info сайтына сілтеме жасап.
Данияр Кенжеұлы өз жазбасында қазіргі қоғамдағы дін мен мемлекеттің арақатынасына тоқталып, кейбір діни тұлғалардың ұстанымына қатысты мынадай пікір білдірді:
«Біз секулярлы қоғамда өмір сүріп жатырмыз деген желеумен либералды көзқарастарды насихаттауға жақындап бара жатқандаймыз. Мемлекет пен дін бір-бірінен бөлек деген сайын, олардың ықпалы керісінше артып келе жатқандай әсер қалдырады. Себебі екеуі де қоғамға ықпал етеді. Екі бағытты қатар ұстауға тырысқандар осындай қайшылықтарға тап болады».
Дінтанушының айтуынша, Нұрлан имам әлеуметтік желілер мен шоу-бизнес кеңістігінде жиі көрініп, өз құзыреті жетпесе де пәтуа айтуды әдетке айналдырған.
«Көп жағдайда исламды тым жұмсартып, субъективті пікір арқылы түсіндіру үрдісі байқалады. Бұған дейін жасы мен ағалық жолын сыйлап, үнсіз қалған едік. Алайда соңғы насихатында ислам атынан сөйлейтін ұстаздарды нәпсінің қалауымен пәтуа іздейтін көпшілікке оңай жеңдіріп қоюы – арға тиетін жағдай болды», – деп толықтырды ол.
Сондай-ақ, Данияр Кенжеұлы «халықты бөлмеу» деген ниетпен айтылған сөздердің, керісінше, елдің рухани деңгейін көтеруді мақсат еткен өзге ұстаздарды жікке бөліп жібергенін атап өтті. Жазба соңында ол Қазақстан мұсылмандары діни басқармасынан (Мүфтияттан) Нұрлан имамның бұл әрекеттерін бақылауға алып, тиісті шара қолдануын сұрады.
Бұл мәлімдеме әлеуметтік желі қолданушылары арасында қызу талқыланып жатыр. Бірі дінтанушының бұл сөзін орынды деп санаса, енді бірі Нұрлан имамның қарапайым халыққа түсінікті тілде сөйлеуін қолдайтынын білдіруде.
Посмотреть эту публикацию в Instagram
