Жыл басынан бері Қазақстанда терроризм актісі туралы жалған хабар таратқан 23 адам қылмыстық жауапкершілікке тартылып, олардың жетеуі 14-17 жас аралығындағы жасөспірімдер екені анықталды, – деп хабарлайды 7-su.kz ақпараттық порталы.
Ішкі істер министрлігінің мәліметінше, жарылғыш зат қойылғаны немесе өзге де қауіп-қатер бар екені жөніндегі негізсіз деректер телефон, электронды пошта, мессенджерлер мен әлеуметтік желілер арқылы таратылады. Көбіне осындай қадамға мәселенің байыбына бармайтын жеткіншектер барады. Олар мұны жай ғана әзіл немесе өзгелердің назарын аудару тәсілі деп қабылдайды.
Сваттинг деген не және оның салдары қандай?
Цифрлық кеңістікте жалған қауіп туралы хабарлап, оқиға орнына арнайы жасақ пен құтқарушыларды әдейі шақырту «сваттинг» деп аталады. Заманауи технологиялар дамыған уақытта ғаламторда із қалдырмай кету мүмкін емес. Құқық қорғау органдары кез келген қоңырау мен хабарламаның авторын санаулы сағат ішінде анықтайтын техникалық мүмкіндіктерге ие.
Жалған ақпарат түскен сәтте мектептер, ауруханалар мен сауда орталықтары шұғыл эвакуацияланады. Оқиға орнына полиция, өрт сөндірушілер, жедел жәрдем және саперлер жұмылдырылады. Соның салдарынан жүздеген азаматтың қалыпты жұмысы тоқтап, мемлекет қазынасынан қомақты қаражат пен уақыт жұмсалады. Ал нағыз көмекке мұқтаж жандарға арналған ресурстар босқа сарп етіледі.
Заң талабы мен ата-аналардың жауапкершілігі
Қазақстан заңнамасына сәйкес, терроризм актісі туралы көрінеу жалған хабар таратқаны үшін қылмыстық жауапкершілік 14 жастан басталады. Аталған заңбұзушылық үшін 5 жылға дейін бас бостандығынан айыру жазасы қарастырылған. Сонымен қатар кінәлі тарап шұғыл қызметтердің шығындарын қоса алғанда, келтірілген барлық материалдық залалды өз қалтасынан өтеуге міндеттеледі. Мұндай жағдайда қаржылық ауыртпалық тікелей ата-аналардың мойнына түседі.
Қоғамдық қауіпсіздікті сақтау және жастарды осындай қателіктерден қорғау мақсатында мектептер мен отбасында түсіндіру жұмыстарын күшейту маңызды. Цифрлық сауаттылықты арттырып, әрбір әрекеттің заң алдындағы жауапкершілігін балаларға ерте жастан ұғындыру оң нәтиже береді.






