Әлеуметтік желіде тұрмыстық зорлық-зомбылық көріністері бейнеленген видео тарады. Бейнежазба сипаттамасында Тараз қаласының тұрғыны 12 баланы асырап алғаны, олардың екеуі – Назгүл мен Құндызға күш көрсеткені айтылған. Сондай-ақ асырап алынған 10 баланың мүгедектігі бар екені нақтыланады, – деп хабарлайды 7su.kz ақпараттық порталы.
Аталған жағдайға байланысты редакция өңірлік полиция департаментіне сауал жолдады. Полицияның мәліметінше, бұл дерек бойынша Қазақстан Республикасы Қылмыстық кодексінің 110-бабы (Азаптау) негізінде сотқа дейінгі тергеу амалдары басталған.
Қазіргі таңда қажетті тергеу шараларының кешені жүргізіліп жатыр. Құқық қорғау органдары оқиғаның барлық мән-жайын жан-жақты әрі мұқият зерделеуде. Тергеу қорытындысы бойынша Қазақстан Республикасының заңнамасына сәйкес тиісті процессуалдық шешім қабылданатын болады, – делінген полицияның ресми жауабында.
