Қазақстан Республикасының Конституциясы – мемлекетіміздің құқықтық іргетасы әрі ұлттық құндылықтарды айқындайтын басты құжат. Осы тұрғыдан алғанда, мемлекеттік тіл – қазақ тілінің мәртебесін нақты әрі пәрменді түрде көтеру уақыт талабы. Бұл мәселеде Халық кеңесінің қоғамдағы пікірді жинақтайтын және халық пен билік арасындағы алтын көпір ретіндегі рөлі айрықша.
Халық кеңесінде көтеріліп жүрген тілге қатысты ұсыныстар мен қоғамдық сұраныстарына сай, Конституцияға мемлекеттік тілдің қолданылу аясын кеңейтетін тың өзгеріс енгізетін кез келді деп санаймын. Атап айтқанда, мемлекеттік тілдің барлық мемлекеттік басқару органдарында, заң шығару, сот жүйесі мен қоғамдық өмірдің негізгі салаларында басым әрі міндетті тіл ретінде қолданылуын нақтылайтын конституциялық норма бекітілуі қажет.
Мұндай өзгеріс бір жағынан Конституцияның рухын күшейтсе, екінші жағынан Халық кеңесі арқылы халықтың еркін, ұлттық мүддені айқын көрсететін шешім болар еді. Бұл қадам қазақ тілінің шынайы мемлекеттік тіл ретіндегі мәртебесін нығайтып қана қоймай, ел бірлігін, ұлттық бірегейлікті және қоғамдық келісімді күшейтуге ықпал ететіні сөзсіз.
Айдын КӘЛІМХАН,
Қазақстан Жазушылар Одағының,
Журналистер одағының мүшесі.
